بەریتانیا پێدانی ڤیزای خوێندن و کارکردن سنووردار دەکات

ئاڤا نیوز

 

حکومەتی بەریتانیا  دەیەوێت بە ئامانجی ڕووبەڕووبوونەوەی خراپ بەکارهێنانی ڤیزای خوێندن، پێدانی ڤیزا بە هاووڵاتیانی ژمارەیەک وڵات لەنێوایاندا پاکستان، نەیجیریا و سریلانکا سنووردار بکات.

 

وێنە گەورەکە: ساڵانە هەزاران کەس لە وڵاتانی جیهانەوە بە پاساوی خوێندن  و کارکردن، لەڕێگەی ڤیزای خوێندنەوە دەچنە بەریتانیا و دواتر داوای مافی پەنابەرێتی لەو وڵاتە دەکەن، ئێستا شانشینی بەریتانیا دەیەوێت لە ڕێگەی سنووردارکردنی پێدانی ڤیزاوە بە هاووڵاتیانی ژمارەیەک وڵات، ڕووبەڕووی هاتنی بەلێشاوی پەنابەران بۆ وڵاتەکەی ببێتەوە.

 

بڵاوکراوەی فەرمی: ڕۆژنامەی تایمزی بەریتانی بڵاویکردەوە، ڕەنگە وەزارەتی ناوخۆی بەریتانیا پێدانی ڤیزای کارکردن و خوێندن لە نەتەوەکانی وەک پاکستانی، نەیجیری و سریلانکی سنووردار بکات، ئەمەش بەشێکە لەو پلانانەی کە لە داهاتوودا حکومەتی بەریتانیا ڕایدەگەیێنێت بۆ کەمکردنەوەی کۆچبەران. 

 

لێدوانی فەرمی: وتەبێژی وەزارەتی ناوخۆی بەریتانیا ڕایگەیاند، بۆ ڕووبەڕووبوونەوەی خراپ بەکارهێنانیی ڤیزای کارکردن و خوێندن لەلایەن ئەو هاووڵاتییە بیانیانەی دێنە بەریتانیا، زانیاریی هەواڵگری لەسەر فایلی ئەو کەسانە کۆدەکەنەوە بۆ ئەوەی لە زووترین کاتدا دەستنیشان بکرێن و ڕەوانەی وڵاتەکەی خۆیان بکرێنەوە.