عەلی قەرەداخی سەردانی سەرۆک بارزانی و مەسرور بارزانی دەکات

ئاڤا نیوز
 
د. عەلی قەرەداخی، سەرۆكی یەكێتیی جیهانیی زانایانی موسڵمان ئەمڕۆ سێشەممە بەجیا سەردانی سەرۆک مەسعود بارزانی و مەسرور بارزانی کرد، لەمیانەی دیدارەکانیشی دا چەندین بابەتی گرنگی پەیوەست بە بارودۆخی سیاسی و دوایین گۆڕانكارییەكانی ناوچەكە و ئاییندەی كورد لە سووریا تاوتوێ کراون. 
 
 
ڕاگەیێنراوی فەرمی: بارەگای بارزانی بڵاویکردەوە، سەرۆک مەسعود بارزانی لە سەڵاحەددین پێشوازی لە د. عەلی قەرەداخی، سەرۆكی یەكێتیی جیهانیی زانایانی موسڵمان و شاندی یاوەری كرد، لەمیانەی دیدارەکەیاندا بیروڕا لەبارەی بارودۆخی سیاسی و دوایین گۆڕانكارییەكانی ناوچەكە و ئاییندەی كورد لە سووریا و پێویستیی پشتبەستنی لایەنەكانی سووریا بە شێوازی ئاشتییانە و دیالۆگ بۆ چارەسەری گرفتەكان ئاڵوگۆڕ كرا.

 

- هەر لەمیانەی ئەو دیدارەدا هەڵسەنگاندنی ئەرێنی بۆ ویست و هەنگاوەكانی لایەنە سیاسیەكانی توركیا كرا كە بە ئاڕاستەی چارەسەری ئاشتیانە لە توركیا دەنرێن.

- بارودۆخی ناوخۆی هەرێمی كوردستان و پەیوەندییەكانی نێوان حكومەتی هەرێمی كوردستان و حكومەتی عێراقی فیدڕاڵ تەوەرێکی دیکەی ئەو دیدارە بوون و ڕۆشناییش خرایە سەر هەنگاو و گفتوگۆكانی پێكهێنانی كابینەی دەیەمی حكومەتی هەرێمی كوردستان 

لەلایەکی دیکەوە: ماڵپه‌ڕی‌ حكومه‌تی‌ هه‌رێم بڵاویکردەوە، ئەمڕۆ سێشەممە سەرۆکوەزیران مەسرور بارزانی، پێشوازی له‌ د. عه‌لی قه‌ره‌داخی کرد، لە کۆبوونەوەی نێوانیاندا بیروڕا له‌باره‌ی دۆخی گشتیی هه‌رێمی كوردستان و ناوچه‌كه‌ ئاڵوگۆڕ كرا.

 

- هاوکات هەردوولا جه‌ختیان له‌ "پێویستیی پاراستنی ئاشتی و ئارامی و سه‌قامگیری و به‌هێزكردنی گیانی به‌یه‌كه‌وه‌ژیان و ته‌بایی و برایه‌تی له ‌نێوان گه‌لان و پێكهاته‌كانی ناوچه‌كه‌دا کردووەتەوە".