ئەنجوومەنی وەزیران تاووتوێی كەمكردنەوەی نرخی كارەبای 24 كاتژمێری دەكات

ئاڤا نیوز

ئەنجوومەنی وەزیرانی هەرێمی كوردستان كۆدەبێتەوە و لەمیانەدا تاووتوێی كەمكردنەوەی نرخی كارەبای 24 كاتژمێری دەكات و نرخی فەرمیی دیار دەكات.

وێنە گەورەکە: پڕۆژەی ڕووناکی بۆ دابینکردنی کارەبای 24 کاتژمێری بەردەوام لە فراوانبوونە، تاوەکو ئێستا 600 هەزار هاونیشتمانی لێی سوودمەند بوون، بڕیارە تاوەکو ساڵێک و حەوت مانگی دیکە بگاتە سەرتاسەری هەرێمی کوردستان.

زانیاریی بەدەستهاتوو: سبەی چوارشەممە ئەنجوومەنی وەزیران كۆدەبێتەوە گفتوگۆ لەسەر سێ بڕگە دەكات و یەكێك لە بڕگەكان بریتی دەبێت لە گفتوگۆكردن لەسەر چۆنیەتی كەمكردنەوەی نرخی كارەبای 24 كاتژمێری، ئەمە لە كاتێكدایە كە چەند ڕۆژێك پێش ئێستا ئاڤا میدیا لە سكووپێكدا ئەوەی ئاشكرا كرد كە ئەم چوارشەممەیە لە كۆبوونەوەی ئەنجوومەنی وەزیران بە فەرمی نرخی كارەبای 24 كاتژمێری دیار دەكرێت، نرخیش لەسەر بنەمای کیلۆوات دەبێت و ئەو نرخەی ئێستا هەیە ئەزموونییە.

زانیاریی تایبەت: ئاڤا میدیا زانیویەتی كە وا بڕیارە لە كۆبوونەوەكە باس لە كەمكردنەوەی تێچووی بەكارهێنان و ڕێگری لە بەهەدەردان و هاوسەنگی لە دابەشكردنی كارەبا بكرێت و وەزیری كارەبا ڕاپۆرتێك لەمبارەیەوە بخاتە ڕوو و دواتر گفتوگۆی لەسەر بكرێت.

لەلایەكی دیكەوە: تیمی پڕۆژەی ڕووناکی بە ئاڤایان وت، دانانی نرخی کیلۆوات بە هەڕەمەکی دانەنراوە، هەڵسەنگاندن کراوە و بەجۆرێک دانراوە لەگەڵ گوزەران و ژیانی خەڵک بگونجێت، لەوەی ئێستاش هەیە هەرزانتر دەبێت. بەپێی ئاستەکان هاوبەشان تا کەمتر کارەبا بەکاربهێننن مانگانە کەمتر پارە دەدەن.