کۆمیسیۆن لەڕێگەی ئاڤاوە دەنگۆیەک لەبارەی پارێزگای هەڵەبجە ڕەتدەکاتەوە

ئاڤا نیوز

کۆمیسیۆنی هەڵبژاردنەکانی عێراق ڕایگەیاند، دەنگۆی هەژمارکردنی پارێزگای هەڵەبجە وەک بازنەیەکی سەربەخۆ لە هەڵبژاردنی پەرلەمانی عێراق دوورە لە ڕاستییەوە ئەم بابەتە پێویستی بە هەموارکردنەوەی یاسای هەڵبژاردنەکانی عێراق هەیە.

وێنە گەورەکە: دوێنێ یاسای بەپارێزگابوونی هەڵەبجە لە ڕۆژنامەی وەقائیعی عێراق بڵاوکرایەوە و بە فەرمی بووە 19هەمین پارێزگای عێراق، ئەمڕۆش چەند دەزگایەک بەناوی کۆمیسیۆنەوە بڵاویانکردەوە کە هەڵەبجە وەک بازنەیەکی سەربەخۆ لە هەڵبژاردنی پەرلەمانی عێراق مامەڵەی لەگەڵ دەکرێت نەک وەک بەشێک لە بازنەی پارێزگای سلێمانی.

لێدوانی فەرمی: جومانە غەلای، وتەبێژی کۆمیسیۆنی هەڵبژاردنەکانی عێراق بە ئاڤا میدیای ڕاگەیاند، هەواڵی هەژمارکردنی پارێزگای هەڵەبجە وەک بازنەیەکی سەربەخۆ لە هەڵبژاردنی پەرلەمانی عێراق لە 11-11-2025 کە چەند میدیایەک بڵاویانکردووەتەوە، دوورە لە ڕاستییەوە و هیچ بنەمایەکی نییە.

ئەوەی پێویستە بیزانیت: بەگوێرەی یاسای هەڵبژاردنەکان ژمارە 12ی ساڵی 2018 و بۆ هەڵبژاردنی پەرلەمان، عێراق بەسەر 18 بازنە دابەشکراوە، واتە هەر پارێزگایەک بازنەیەکی سەربەخۆ دەبێت، بۆ ئەوەی هەڵەبجەش وەک بازنەیەکی سەربەخۆ هەژمار بکرێت و کورسی بۆ دیاری بکرێت و دەبێت لە پەرلەمان ئەم یاسایە هەموار بکرێتەوە و ژمارەی بازنەکان بکرێتە 19 بازنە، کۆمیسیۆنیش پێشتر هۆشداری دابوو کە ئەگەر یاسای هەڵبژاردن هەموار بکرێتەوە بۆ بەڕێوەبردنی هەڵبژاردن پێویستییان بە 10 مانگ ئامادەکاریی دەبێت، بەو پێیەش هەڵبژاردن شەش مانگی ماوە هەمواری یاسای هەڵبژاردن بە قورس و زەحمەت ناودەبرێت.