بەهۆی هێرشەکانی هیندستان باری نائاسایی لە پاکستان ڕاگەیێنرا

ئاڤا نیوز

تا دێت گرژییەکانی نێوان هیندستان و پاکستان زیاتر دەبێت و هەردوولا بە مووشەک وەڵامی یەکتر دەدەنەوە و لە هەرێمی کشمیر باری نائاسایی ڕاگەیێنرا.

چیرۆکی سەرەکی: درەنگانی شەوی ڕابردوو سوپای هیندستان هێرشێکی مووشەکیی بۆسەر چەند ناوچەیەکی پاکستان ئەنجامدا و بەگوتەی خۆیان ژمارەیەک پێگەی تیرۆریستانیان کردووەتە ئامانج، دوای ئەوە پاکستانیش وەڵامی ئەو هێرشانەی دایەوە و وڵاتانی جیهانیش داوایان لە هەردوو وڵات کرد هێرشەکانیان بۆ سەر یەکتر ڕابگرن.

لێدوانی فەرمی: فەرماندەیی سوپای پاکستان ڕایگەیاند: لە ئەنجامی هێرشەکانی سوپای هیندستان 26 هاوڵاتیی  کوژراون و 46 کەسی دیکەش بەسەختی  برینداربوون.

لەلایەکی دیکەوە: پاکستانیش وەڵامی هێرشەکانی هندستانی دایەوە و بەهۆی تۆپبارانکردنی بەشی هیندستانی کشمیر، 10 کەس کوژراون و 48 کەسیش برینداربوون.

زانیاریی زیاتر: دۆناڵد ترەمپ، سەرۆکی ئەمریکا ڕایگەیاند، شەرمە بۆ هەردوو وڵات  و پێویستە بە زووترین کات هێرشەکانیان بۆ سەر یەکتر ڕابگرن.

قووڵتر: هێرشەکانی دوینێ شەو دوای هێرشەکەی ڕۆژی سێشەممەی ڕابردوو دێت لە شاری پاهالگامی کشمیر، کە بەهۆیەوە 26 کەس کوژران، هیندستان بە "تیرۆریستی" ناساندی و پاکستانی بە تێوەگلانی تۆماتبارکرد، ئەوەش گرژییەکانی نێوان هیندستان و پاکستان، کە دوو دەوڵەتی خاوەن چەکی ئەتۆمین، بردە قۆناغێکی نوێوە.