لە هەر پێنج عێراقییەک یەکێکیان جگەرە دەکێشێت

ئاڤا نیوز

بەگوێرەی ئامارەکان لە هەر پێنج هاووڵاتییەکی عێراقییەک یەکێکیان جگەرە و هاوشێوەکانی دەکێشێت، وەزارەتی تەندروستیش ئاشکرای دەکات کە جگەرەکێشان یەکێک لە 10 بڵاوترین هۆکارەکانی مردنی خەڵکی عێراقە بۆیەش هەوڵی سنووردارکردنی بەکارهێنانی دەدەن.

وێنە گەورەکە: لەم ساڵانەی دواییدا و لەگەڵ سەرهەڵدانی ڤەیپ، جگەرەی ئەلیکترۆنیی و هاوشێوەکانی، ڕێژەی بەکارهێنانی لەنێوان کەسانی تەمەنی خوار 18 ساڵ زیادیکردووە، ئەوەش وایکرد پڕۆژەیاسایەک بۆ قەدەغەکردنی فرۆشتنی جگەرە و هاوشێوەکانی بە کەسانی خوار 18 ساڵ لە پەرلەمانی عێراق ئامادە بکرێت و ئێستا تەنیا دەنگدانی کۆتایی ماوە.

لێدوانی فەرمی: وەسیم گەیلانی، بەڕێوەبەری بەرنامەی ڕووبەڕووبوونەوەی جگەرەکێشان لە وەزارەتی تەندروستیی عێراق ڕایگەیاند، لەئێستادا لە هەر پێنج عێراقییەک یەکێکیان جگەرە دەکێشێت، بەوهۆیەش جگەرەکێشان بە یەکێک لە 10 بڵاوترین هۆکارەکانی مردنی خەڵکی عێراق دادەنرێت.

زانیاریی زیاتر: بەوتەی ئەو بەرپرسەی تەندروستی، جگەرەی ئەلیکترۆنیی لەنێوان گەنجان، هەرزەکار، منداڵ و کچاندا بەشێوەیەکی بەرچاو بڵاوبووەتەوە و ئەوەش زیانی تەندروستی گەورەی هەیە، بۆیە پڕۆژەیاسای قەدەغەی فرۆشتنی جگەرە بە کەسانی خوار 18 ساڵ هەنگاوێکی باشە بۆ سنوردارکردنی جگەرەکێشان، چونکە یاساکە پێبژاردن و سزا بۆ ئەو کەسانە دادەنێت کە جگەرە بە  کەسانی خوار 18 ساڵ دەفرۆشن.