ئەنجوومەنی هاریکاریی کەنداو دژایەتی خۆی بۆ داواکارییەکانی عێراق ڕاگەیاند

ئاڤا نیوز

وڵاتانی ئەنجومەنی هاریکاریی کەنداو، پشتگیریی خۆیان بۆ هەڵوێستی کوەیت سەبارەت بە پرسی دیاریکردنی سنوورە دەریاییەکان لەگەڵ عێراق دەربڕی و دژی داواکارییەکانی عێراقە لە دۆسیەی خۆر عەبدوڵڵا وەستانەوە.

چیرۆکی سەرەکی: هەریەک لە عەبدوللـەتیف ڕەشید، سەرۆککۆمار و محەممەد شیاع سوودانی، سەرۆکوەزیرانی عێراق لە دادگای فیدراڵی سکاڵایان تۆمارکردووە و داوا دەکەن دادگای فیدڕاڵی پێداچوونەوە بە بڕیارێکی خۆیدا بکات بۆ هەڵوەشاندنەوەی ڕێککەوتنی ئاویی نێوان عێراق و کوەیت.

لێدوانی فەرمی: جاسم ئەلبەدیوی، ئەمینداری گشتیی ئەنجوومەنی هاریکاریی کەنداو ڕایگەیاند، ئەنجوومەنی وەزیرانی کەنداو کۆبوونەوەی نائاسایی بە سەرۆکایەتی عەبدوڵڵا یەحیا، وەزیری دەرەوەی کوەیت، سەرۆکی خولی ئێستا ئەنجام دا. لەم کۆبوونەوەکەدا وەزیرانی دەرەوەی وڵاتانی کەنداو گفتوگۆیان لەسەر پێشهاتەکانی دۆسیەی دیاریکردنی سنوورە دەریاییەکان لە نێوان کوەیت و عێراق کرد.

چی ڕوویدا: وەزیرانی دەرەوەی وڵاتانی کەنداو پشتگیری و پشتیوانی تەواوی خۆیان بۆ هەڵوێستی کوەیت سەبارەت بە پرسی دیاریکردنی سنوورە دەریاییەکان لە نێوان کوەیت و عێراق دەربڕی و هەر جۆرە دەستدرێژییەکی بۆ سەروەریی کوەیت ڕەتکردەوە. جەختیشیان لەوە کردەوە کە تەواوی کێڵگەی دۆرا لە ناوچە دەریاییەکانی دەوڵەتی کوەیتدایە، هەروەها خاوەندارێتی لە سامانە سروشتییەکانی بە هاوبەشی لە نێوان کوەیت و سعوودیە دەبێت.

باکگراوند: ڕێککەوتنی خۆر عەبدوڵڵا، ساڵی 2012 لەنێوان عێراق و کوەیت واژۆکرا، بەهۆی ئەو ڕێککەوتنەش عێراق مافی هاوبەشی لە ڕێڕەوی ئاوی خۆر عەبدوڵڵای لەدەستدا و رووبەرێکی فراوانی ئاوی لەسەر حیسابی عێراق درایە کوەیت، ئەوکاتیش ڕێککەوتنەکە ناڕەزایی لێکەوتەوە و مالیکی کە ئەوکات سەرۆکوەزیران بوو تۆمەتبارکرا بەوەی سازشی لەسەر مافی عێراق لە ڕێڕەوی دەریایی خۆرعەبدوڵڵا کردووە.