وەزیری شارەوانی وادەی تەواوبوونی شەقامی 100 مەتری سلێمانی ڕادەگەیێنێت

ئاڤا نیوز

کارکردن لە پڕۆژەی شەقامی 100 مەتری سلێمانی کە بە شاڕێی بابان ناسراوە بەردەوامە و وەزیری شارەوانی و گەشتوگواری هەرێمی کوردستانیش ڕایدەگەیێنێت، لە سێ بۆ چوار مانگی داهاتوودا شەقامەکە بەڕووی هاتووچۆی شۆفێراندا دەکرێتەوە.

وێنە گەورەکە: شەقامی 100 مەتری سلێمانی کە بە ناوی شاڕێی بابان ناونراوە، یەکێکە لە پڕۆژە ستراتیژییەکانی حکومەتی هەرێمی کوردستان، درێژی شەقامەکە 146 کیلۆمەترە و بە سێ قۆناغ جێبەجێ دەکرێت، ئەو قۆناغەی ئێستا کاری تێدا دەکرێت 33 کیلۆمەترە و لە تاسلوجەوە دەستپێدەکات تاوەکو سەر ڕێگای عەربەت، شەقامەکە حەوت یەکتربڕ، پێنج ئەندەرپاس، یەک ئۆڤەرپاس، 67 ئاوبارەی کۆنکرێتی و پردێک لە خۆ دەگرێت.

لێدوانی فەرمی: ساسان عەونی، وەزیری شارەوانی و گەشتوگوزاری حکومەتی هەرێمی کوردستان، بە ئاڤا میدیای ڕاگەیاند،  شەقامی 100 مەتری سلێمانی کارەکانی بە بەباشی بەڕێوەدەچێت، نزیکەی 70% کارەکانی تەواوبووە و چاوەڕێ دەکرێت لە سێ بۆ چوار مانگی داهاتوو شەقامەکە بەڕووی هاتووچۆی شۆفێراندا بکرێتەوە".