پەرلەمانتارێکی دەم پارتی: لە ماوەی 10 ڕۆژدا گۆڕانکاری خێرا لە پرۆسەی ئاشتی ڕوودەدات

ئاڤا نیوز

بەهۆی کۆچی دوایی سری سورەییا ئۆندەر، بریکاری سەرۆکی پەرلەمانی تورکیا و سەرۆکی شاندی ئیمراڵی تاڕاددەیەک خاوبووەتەوە، چاوەڕێ دەکرێت لەم چەند ڕۆژە دەست بە کارەکان بکرێتەوە.

وێنە گەورەکە: بەر لەوەی ئۆندەر نەخۆش بکەوێت، لە میدیاکانی تورکیا باس لەوە دەکرا کە لە کۆتایی مانگی نیسان و سەرەتای مانگی ئایار پەکەکە کۆنگرە دەبەستێت و خۆی هەڵدەوەشێنێتەوە، بەڵام دوای نەخۆش کەوتن و کۆچی دوایی ئۆندەر پرۆسەکە خاوبووەوە و ئەمەش تا ڕاددەیەک دوو دڵی لە نێو خەڵکیدا دروست کردووە.

لێدوانی تایبەت: محەممەد کەماچ، پەرلەمانتاری دەم پارتی بە ئاڤای گوت: لەم چەند ڕۆژەدا کارکردن بۆ پرۆسەی ئاشتی دەست پێدەکەینەوە، لەماوەی 10 ڕۆژدا گۆرانکاری خێرا ڕوودەدەن، لەمەودوا سەردانیکردنی ئیمرالی زیاتر دەبێت و لە هەفتەیەکدا دوو بۆ سێ جار شاندەکە سەردانی ئیمرالی دەکات. وەک هاوڕێ و هاوکارەکانی ئۆندەر بە ورەیەکی زیاترەوە کار بۆ بەجێ گەیاندنی پرۆسەکە دەکەین کە خەونی ئۆندەر بوو.

لەلایەکی دیکەوە: لە بارەی داواکارییەکانی دەم پارتی کە پێشکەش بە یڵماز تونج، وەزیری داد کرا، کەماچ گوتی: تاوەکو ئێستا وەزارەتی داد بە فەرمی وەڵامی داواکارییەکانی نەداوینەتەوە، بەڵام نزیک بوونەوەی ئەرێنی هەیە.