سێ مانگی ئەمساڵ زیاتر لە 450 تۆمەتباری ماددەی هۆشبەر دەستگیرکراون

ئاڤا نیوز

لە سێ مانگی یەکەمی ئەمساڵ، لەلایەن هێزەکانی ئاسایشی سەر بە بەڕێوەبەرایەتی نەهێشتنی ماددە هۆشبەرەکان سەدان تۆمەتباری بازرگانیکردن و بەکارهێنەری ماددەی هۆشبەر دەستگیرکراون.

وێنە گەورەکە: ئەگەرچی بازرگانانی ماددەی هۆشبەر دەیانەوێت سوود لە پێگەی جوگرافی هەرێمی کوردستان ببینن، وەک ناوچەی تێپەڕین (ترانزێت)ـی ماددەی هۆشبەر بەکاریبهێنن، بەڵام هێزەکانی ئاسایشی هەرێمی کوردستان ڕێگرییان لەو هەوڵانە کردووە و ساڵانە سەدان کەسیان لێ دەستگیر دەکات.

لێدوانی فەرمی: نەقیب ئەرکان بیبانی، وتەبێژی بەڕێوەبەرایەتی گشتی بەرەنگاربوونەوەی ماددە هۆشبەرەکان بە ئاڤا میدیای وت، ئەمساڵ لە ڕێککەوتی 1-1 تاوەکو 31-3-2025 لەماوەی سێ مانگدا 458 تۆمەتباری ماددەی هۆشبەر دەستگیرکراون، لەو ژمارەیە 217 کەسیان بەکارهێنەر بوون و 241 کەسی دیکەیان بازرگان بوون.

ژمارەکان وا دەڵین: ئاماری بەڕێوەبەرایەتی نەهێشتنی ماددە هۆشبەرەکان دەریدەخات لەگەڵ دەستگیرکردنی تۆمەتباران ئەم ماددانەش دەستیان بەسەردا گیراوە:

٠  148 کیلۆ و 470 گرام ماددەی هۆشبەر بە هەموو جۆرەکانی وەک کریستاڵ، تلیاک، کۆکاین، ماریجوانا، هیررۆین و حەشیش.

٠ 70 کیلۆ گرام حەبی کەپتاگۆن دەستی بەسەردا گیراوە.

٠ 8319 شیت حەبی هۆشبەر، بەشێکیان بۆ  بواری تەندروستی بەکاردێن، بەشێکی دیکەیان بە مەبەستی بەکارهێنان وەک ماددەی هۆشبەر بەکاردێن.