کاردانەوەی هێرشە مووشەکییەکانی ئێران لە میدیا جیهانییەکاندا

ئاڤا دیجیتاڵ

 

شەوی دووشەممە، كۆماری ئیسلامی ئێران بە مووشەكی بالیستیک هێرشی كردە سەر هەولێر. بەهۆی ئەو رووداوەوە، چوار كەس گیانیان لە دەستدا و شەش كەسی دیكەش برینداربوون، تاوەکو ئێستاش کەسێک بێسەروشوێنە. بۆردوومانەکەی ئێران زیانێكی زۆری بە شوێنە بەئامانجگیراوەکان گەیاند و "بەخێرایی" لە میدیا جیهانییەكانەوە بڵاوبوویەوە.

 

چیرۆكە سەرەكییەكە: سوپای پاسداران بە 15 مووشەكی بالیستی هێرشی كردە سەر چەند شوێنێك لە پارێزگای هەولێر، بەهۆیەوە چەندین هاووڵاتی بوونە قوربانی، وزارەتی بەرگریی ئێران، بەرپرسیاریێتیی خۆی لە هێرشەكە راگەیاند و ئەمریكاش زۆر بەتوندی سەرکۆنەی كرد.

 

ئەوەی ئێستا روودەدات: هێرشە مووشەكییەكە لە ناوخۆ و دەرەوە كاردانەوەی لێكەوتەوە. لەگەڵ نووسینی ئەم بەدواداچوونەدا لە بەردەم نەتەوەیەكگرتووەكان خۆپێشاندانە دژی هێرشەكە،. قاسم ئەعرەجی، راوێژكاری ئەنجوومەنی ئاسایشی نەتەوەیی عێراق گەیشتە هەرێمی كوردستان و بەشێك لە كۆنسولی وڵاتانیش سەردانی بریندارەكانیان كرد.

 

ئەوەی پێویستە بیزانیت: سەرۆكوەزیران بارزانی لە داڤۆسەوە بۆ میدیاكان قسەی كرد و گوتی هیوادارین، چی دیكە ئەم ڕووداوانە دووبارە نەبنەوە و ئەم ڕووداوانە بەس بە سەرکۆنەکردن چارەسەر نابن و دەبێت هەڵوێستی جددیی هەبێت.

 

کاریگەریی و لێکەوتەکان: هەواڵی مووشەکبارانکردنی هەولێر "بەخێرایی" بووە مانشێتی ڕۆژنامەکان و لە میدیا جیهانییەكانیش كاردانەوەی گەورەی هەبوو.  

 

جەزیرە: ئێران هەولێری بۆردوومان كرد، هاووڵاتیی كوژراون، هێرشەكە لە نزیك باڵوێزخانەی ئەمریكا بووە.

رۆیتێرز: ئێران دەڵێت هێرشیان كردوەتە سەر بنكەیەكی مۆساد لە هەولێر و سوێند دەخۆن تۆڵەی زیاتر دەكەنەوە.

ئەی بی سی نیوز: هەولێر كرایە ئامانجی مووشەكی و ئێران رایگەیاند ئەوە کاری ئەوانە.

ئەنادۆڵ: ل هێرشەكەی هەولێردا چوار كەس كوژراون، هێرشەكە ئێران كردوویەتی.

ئاژانسی ویۆنگ: ئێران هەولێری كردە ئامانج، مووشەكی لە چەند شوێنێك داوە.

ئیندیپێندن: ئێران دەڵێت "بنكەیەكی سیخوڕی ئیسرائیل"ـیان لە هەولێر كردووەتە ئامانج.

نیویۆرك تایمز: ئێران مووشەكی ئاراستەی هەولێر کردووە و چەندین هاووڵاتی بوونەتە قوربانی.

سی ئێن ئێن: ئێران لە تۆڵەی هێرشەكانی ئەم دواییەدا، لە هەولێر تۆڵەی خۆی كردەوە

 

باکگراوند: لە سەرەتای شەڕی گرووپە چەكدارەكان و سوپای ئیسرائیل لە كەرتی غەززە، گرووپە چەكدارە عێراقییەكانی "نزیك لە ئێران" 69 جار هێرشی مووشەكی و درۆنییان كردووەتە سەر بنكە و بارەگاكانی ئەمریكا لە فرۆكەخانەی نێودەوڵەتیی هەولێر و بنكەی سەربازیی هەریر. ئەمە دووەم جاریشە ئێران راستەوخۆ هەولێر بۆردوومان دەكات و بەرپرسیارێتیی خۆشی لە ڕووداوەكە ڕادەگەیەنێت.