دهۆک دەکرێتە پایتەختی زەیتوون و فستق

ئاڤا نیوز

پرۆژەی دارچاندن لە پارێزگای دهۆک لە بواری جێبەجێکردندایە، بڕیارە زیاتر لە یەک ملیۆن دار لە جۆری زەیتوون و فستق لە دهۆک و دەوروبەری بچێنرێن، پڕۆژەکە لە ڕێگەی کەرتی تایبەتەوە دەکرێت.

وێنە گەورەکە: لە کابینەی نۆیەمی حکومەتی هەرێمی کوردستان، گرنگی تایبەت بە زیادکردنی ڕێژەی سەوزایی دراوە و بەردی بناغەی چەندین پارک دانراوە بەمەبەستی گەیاندنی ڕێژەی سەوزایی بە ستانداردی جیهانی، لە پارێزگای دهۆکیش پڕۆژەی چاندنی زیاتر لە یەک ملیۆن داری زەیتوون و فستق لە بواری جێبەجێکردندایە.

لێدوانی فەرمی: ئەحمەد جەمیل، بەڕێوەبەری گشتیی کشتوکاڵی دھۆک، بە ئاڤا میدیای ڕاگەیاند، لە پارێزگای دهۆک دوو پڕۆژەی دارچاندن لە جێبەجێ کردن دان کە ملیۆنێک و 40 ھەزار دار دەچێنن، پڕۆژەکە بە چەند قۆناغێک جێبەجێدەکرێت و نزیکەی سێ ساڵ دەخایەنێت، "دەمانەوێت لە چاندنی داری زەیتوون و فستق لەسەر ئاستی ھەرێمی کوردستان و عێراق یەکەم بین".

- "پڕۆژەکانمان لەڕێگەی کەرتی تایبەت جێبەجێدەکەین، یەکێک لەوانە پڕۆژەی کاڤین گرووپە کە تا یەک ملیۆن داری زەیتوون دەچێنن.

- تاوەکو ئێستا نزیکەی 300 ھەزار داریان لە سنووری پارێزگای دھۆک چاندووە، پڕۆژەیەکی تر لە ئاکرێ ھەیە ئەوانیش 40 ھەزار دار دەچێنن.