فەرەنسا و بەریتانیا ڕێکارەکانی وەرگرتنی پەنابەران و مافی هاوڵاتیبوون سنوردار دەکەن

ئاڤا نیو.

فەرەنسا و بەریتانیا سیاسەتێکی نوێی وەرگرتنی پەنابەران و مەرجی نوێ بۆ پێدانی مافی هاوڵاتیبوون ڕادەگەیەنن.

وێنە گەورەکە: لە چوارچێوەی سیاسەتی یەکێتی ئەوروپا بۆ ڕێگریکردن لە چوونی پەنابەران بۆ وڵاتانی ئەوروپا و بەڵێنی پارتی کرێکارانی بەریتانیا بۆ ڕاهێنان و بەگەڕخستنی دەستی کاری ناوخۆی وڵات، وەزیری ناوخۆی فەرەنسا فەرمانێکی نوێی پەیوەست بە ڕێکارەکانی وەرگرتنی پەنابەران و داوای مافی هاوڵاتیبوون واژۆ دەکات، لە هەمان کاتدا بەریتانیا ئامادەکاری دەکات بۆ سنوردارکردنی پێدانی ڤیزا بە هاوڵاتیانی ژمارەیەک وڵات.

لێدوانی فەرمی: برۆنۆ ڕیتالیۆ، وەزیری ناوخۆی فەرەنسا لە بڕیارێکی نوێدا کە ناوەڕۆکەکەی لەلایەن پارێزگارەکانەوە بۆ میدیاکان خراوەتە ڕوو، سیاسەت و ڕێکاری نوێی بۆ وەرگرتنی مافی پەنابەری و پێدانی مافی هاووڵاتیبوون ڕاگەیاندووە، بە ئامانجی سنوردارکردنی بەدەستهێنانی ڕەگەزنامەی فەرەنسی لەلایەن بیانییەکانەوە كه‌ له‌و وڵاته‌ داوای مافی مانه‌وه‌ ده‌كه‌ن. هەروەها کۆمەڵێک مەرجی دیاریکردووە کە پابەندبوونی یاسایی و نەبوونی پێشینەی تاوانکاری، تاقیکردنەوەی ئاستی زمان و مێژووی فەرەنسی و سەربەخۆیی دارایی، بەشێکن لە مەرجەکانی داوای مافی هاوڵاتیبوون.

- وەزیری ناوخۆی فەرەنسا داوا لە پارێزگارەکان دەکات داواکاری مافی هاووڵاتیبوونی هەموو ئەو بیانییانە ڕەتبکرێتەوە کە پێشتر پێشێلکاری یاسایی لە دۆسیەکانیاندا هەبووە.

لە لایەکی دیکەوە: بە پێی میدیاکانی بەریتانیا نوسینگەی سەرۆکوەزیرانی ئەو وڵاتە ئێستا ئامادەکاری دەکات بۆ سنوردارکردنی هاتنی پەنابەران و ڕاسپاردنی کۆمەڵێک ڕێکخراو و کۆمپانیا بۆ ڕاهێنانی دەستی کاری ناوخۆ بۆ پشتنەبەستن بە دەستی کاری بیانی، هەر لەو چوارچێوەیەدا ڤیزای کارکردن و خوێندن بۆ هاووڵاتیانی پاکستان، نەیجیریا و سریلانکا سنوردار دەکرێت.