بڕیاڕێکی نوێ لە کۆمسیۆنەوە لەبارەی کۆنفڕانسی گۆڕان

ئاڤا نیوز

ئەنجوومەنی كۆمسیارانی كۆمسیۆنی هەڵبژاردنەكانی عێراق بڕیاریدا ڕۆژی 24ـی ئەم مانگە کۆنفڕانسی نوێی بزووتنەوەی گۆڕان ببەسترێت، بڕیاردانیش لە کۆنفڕانسەکەدا بە زۆرینەی ئامادەبوون دەبێت نەک زۆرینەی دامەزرێنەران.

چیرۆکی سەرەکی: بڕیاربوو 26ـی نیسان کۆنفڕانسی گۆڕان ببەسترێت، بەڵام بەهۆی ئەوەی لە دوو هەزار و 126 ئەندامە دامەزرێنەرەکەی ئەو حیزبە کەمتر لە نیوەیان ئامادەبوون، بۆیە کۆنفڕانسەکە ڕێژەی یاسایی نەبوو و ئەنجام نەدرا.

ڕاگەیێنراوی فەرمی: ئەنجوومەنی كۆمسیارانی كۆمسیۆنی هەڵبژاردنەكانی عێراق حەوتی ئەم مانگە واتە دوێنێ، کۆبووەوە و بڕیاریدا رۆژی 2025-05-24، كۆنفڕانسی بزووتنەوەی گۆڕان ببەسترێت و فەرمانگەی حیزب و ڕێکخراوە سیاسییەکانی کۆمسیۆنیش خۆی شوێنی کۆنفڕانسەکە دیاریی دەکات و  سەرپەرشتی دەكات.

زانیاریی زیاتر: هەر بەگوێرەی نوسراوەکەی کۆمسیۆن بڕیاردان لە کۆنفڕانسەکەدا بەگوێرەی زۆرینەی ئامادەبووان دەبێت، واتە ئەگەر تەنیا 200 کەسیش ئامادەبن کۆنفڕانسەکە هەر دەکرێت و هەر بڕیارێک 101 ئەندام دەنگی پێبدات، کۆمیسیۆن وەک یاسایی و فەرمی مامەڵەی لەگەڵدا دەکات.