دەم پارتی: هەوڵی تیرۆرکردنی ئۆندەر دراوە

ئاڤا نیوز

دەم پارتی بۆ یەکەمجار دوای کۆچی سڕی سورەیا ئۆندەر، سەرۆکی شاندی ئیمرالی، ئەوە ئاشکرا دەکات کە لە 2ـی نیسان هەوڵی تەقاندنەوەی ئۆتۆمبێلەکەی ئۆندەر دراوە و هێشتا ئەنجامی لێکۆڵینەوەکان دەرنەچوون.

وێنە گەورەکە: لەگەڵ ئەوەی ئۆندەر وا بڵاوکرایەوە کە بەهۆی پچڕانی شاخوێنبەری و جەڵتەی دڵەوە و گیانی لەدەست دا، بەڵام ئەم ڕووداوە بێبەش نییە لە دەنگۆی "کوشتنی ئۆندەر" بە تایبەت دوای ئەوەی زانرا، عەبدوڵڵا ئۆجەلان، هۆشداری پێ داوە کە "ڕەنگە لەلایەن دوژمنانی پرۆسەی ئاشتی بکرێتە ئامانج".

ڕاگەیێنراوی فەرمی: دەم پارتی لە بارەی بانگەشەکانی هەوڵی تیرۆرکردنی ئۆندەر ڕایگەیاند: لە 2ـی نیسان دا، ئۆندەر کاتێک ئۆتۆمبێلەکەی پارک دەکات، گومان لە دەنگێک دەکات کە لە تایەی ئۆتۆمبیێلەکەی دێت، دواتر دەیباتە فیتەر و دەردەکەوێت لە تایەی دواوەی لای چەپ پارچە ئاسنی تیژی پێوە لکێنراوە کە تایەکەی دەتەقاند. 

زانیاریی زیاتر: بەگوێرەی ڕاگەیێنراوەکەی دەم پارتی، بەهۆی هەستیاری دۆخەکەوە، نەیانویستووە ئەوکاتی ئەم هەواڵە بڵاوبکەنەوە، لایەنی پەیوەندیدار ئاگادار کراوەتەوە و لێکۆڵینەوە دەستیپێکردووە، بەڵام تاوەکو ئێستا ئەنجامێکی ڕوون بەدەست نەگەیشتووە.