نەوزاد شێخ كامیل: تا كۆتایی ئەم مانگە سەرجەم پسووڵەی خۆراک دەبێتە ئەلیكترۆنی

ئاڤا نیوز

 

بەڕێوەبەری گشتیی بازرگانی لە وەزارەتی بازرگانی و پیشەسازیی حکومەتی هەرێمی کوردستان، هەفتەی داهاتوو کارتی ئەلیکترۆنی پسووڵەی خۆراک لە پارێزگای هەولێریش کارا دەکرێت، پلانیش وایە تا کۆتایی ئەم مانگە ئاپی کارتی ئەلیکترۆنی پسووڵەی خۆراک لەسەرجەم پارێزگاکانی هەرێمی کوردستان بەردەست بخرێت.

 

وێنە گەورەکە: زیاتر لە پێنج مانگە پرۆسەی بە ئەلیکترۆنیکردنی پسووڵەی خۆراک دەستی پێکردووە، کە داتاکانی سەرجەم پسووڵەی خۆراکی هاووڵاتیان لە ئاپێکی نێو مۆبایل بەردەست دەبێت و مافیان لە بەشەخۆراکی مانگانە پارێزراو دەبێت، لەڕێگەی ئاگادارکردنەوە لەنێو سیستەمەکە.

 

ئەوەی پێویستە بیزانیت: ئەمڕۆ ئاپی نوێکردنەوەی کارتی خۆراک لە پارێزگای هەڵەبجە دەستیپێکرد، هاووڵاتیان دەتوانن لەڕێگەی ئاپ ستۆر یاخود گووگڵ پلەی، ئاپەکە لە مۆبایل داببەزێنن، پێشتریش لە پارێزگای دهۆک بەشێوەی تاقیکاری سیستمەکە کارا کرا.

 

لێدوانی فەرمی: نەوزاد شێخ کامل، بەڕێوەبەری گشتیی بازرگانیی هەرێمی کوردستان تایبەت بە ئاڤا ڕایگەیاند، دوای لێکۆڵینەوە لە چۆنیەنی کارکردنی سیستمەکە لە هەڵەبجە و دڵنیابوون لە ئاستی سەرکەوتنی پرۆسەکە، هەفتەی داهاتوو لە پارێزگای هەولێریش هەوڵدەدرێت سیستمە ئەلیکترۆنییەکە کارا بکرێت و بەگشتیش پلان وایە تا کۆتایی ئەم مانگە ئەو سێ پارێزگایەی هەرێمی کوردستان کە هێشتا کارتی خۆراک نەبوونەتە سیستمی ئەلیکترۆنی، سەرجەمیان تەواو بکرێن و بەئەلیکترۆنی بکرێن.