سەرۆک بارزانی: داهات و سامانی عێراق بۆ قڕكردن و كۆمەڵكوژیی كورد بەكاردەهێنرا

ئاڤا نیوز

 

سەرۆک بارزانی ڕایدەگەیەنێت، لە ماوەی سێ دەیەی ڕابردوودا؛ پێشکەوتنی گەورە لە هەرێمی کوردستان بەدیهاتوون، لەم ساڵانەی دواییدا زنجیرەیەک قەیرانی کێشەی یەک لەدوای یەک و درووستکراو، کاروانی پێشکەوتنی هەرێمی کوردستانیان خاو کردەوە.

 

چیرۆکی سەرەکی: سەرۆک مەسعود بارزانی، لە بەرنامەی بەناوبانگی (The Capitol Hill Show) میوانداری کرا و دیدارەکەی لە کەناڵی شەمس بە هەر سێ زمانی کوردی، عەرەبی و ئینگلیزی پەخشکرا، وەڵامی ژمارەیەک پرسیاری پەیوەست بە مێژووی خەباتی چەکداری، سیاسی و کارگێڕی نەتەوەی کوردی دایەوە.

 

لێدوانی فەرمی: سەرۆک بارزانی لەو دیدارەدا ئاماژەی بەوەکرد، پەیوەندیی کورد لەگەڵ ئەمریکا باشە، چاومان لەوەیە باشتر بێت، ئەمریکا ڕۆڵی سەرەکی هەبووە لە بونیادنانی ئەزموونی سەرکەوتووی هەرێمی کوردستان.

- هەر لەمیانەی دیدارەکەدا سەرۆک بارزانی، باسی لەوەشکرد، لە بابەتە هەستیار و چارەنووسییەکان، پرس بە نەتەوەی کورد نەکراوە، دەمانەوێت بەدیالۆگ و بەڕێگەی ئاشتییانە لەگەڵ نەتەوەکانی دیکە، بە مافەکانی خۆمان بگەین.

 

گرنگترین وتەکانی سەرۆک بارزانی لەم دیدارە:

- کورد لە پێش نەتەوەکانی دیکەی ئەم ناوچەیە ژیاوە، بەڵام بەدرێژایی مێژوو غەدرمان لێکراوە.

- پاڵپشتی هەڵوێستی یەکگرتووی کوردین لە سووریا بۆ مسۆگەرکردنی مافە نەتەوەییەکان.

- نەمانویستووە هیچ گرفتێکمان لەگەڵ ئێران هەبێت.

- نابێت ئێران دەست لەکاروباری ناوخۆی هەرێمی کوردستان وەربدات.

- ئێستا پەیوەندییەکانمان لەگەڵ ئێران ئاسایی و باشە.

- لەماوەی سێ دەیەی ڕابردوودا پێشکەوتنی گەورە لە کوردستان بەدیهاتوون

- پەیوەندیمان لەگەڵ ئەمریکا باشە، چاومان لەوەیە باشتر بێت

- بڕیارەکانی ترەمپ بوێرانەیە و لەجێی خۆیەتی

- ئەوەی بە ئەمریکا دەکرێت لە جیهان لەسەرجەم پرسەکان، بە هیچ وڵاتێکی دیکە ناکرێت    
 
- هیچ کات کوردستان گرفتی ئایینی و مەزهەبی لەگەڵ هیچ لایەنێک نەبووە

- خەڵکی کوردستان زۆر لێبووردەن و چاویان لە تۆڵەسەندنەوە نییە

- هەر لایەنێک شەڕ دروست بکات، هەڵەیەکی گەورەی کردووە، کورد بەردەوام لێبوردە بووە.

- زۆرجار بارودۆخ، بەناچاری شەڕ و بەرەنگاربوونەوەت بەسەر فەرز دەکات

- دەرفەتمان نەبووە وەک پێویست سوود لە خاکی دەوڵەمەندی عێراق و کوردستان وەربگرین

- داهات و سامانی عێراق بۆ قڕکردن و کۆمەڵکوژیی کورد بەکاردەهێنرا

- دەستوور بۆ ئێستاش گونجاوە ئەگەر لایەنەکان پێوەی پابەند بن

- زنجیرەیەک کێشە و قەیرانی یەک لەدوای یەک و دروستکراو، پێشکەوتنی کوردستانیان خاو کردەوە

- کورد وەک پێویست لەبواری سیاسی و بازرگانی دەرفەتی ئازادانەی پێ نەدراوە

- ڕاپەڕینی خەڵکی کوردستان لە 1991 و ڕزگاربوون لە زۆرداری خۆشترین کاتی ژیانم بووە