كشتوكاڵی هەولێر: ئەمساڵ دوو هەزار دۆنم زەویی داچێندراو بە ئاوی پیس پاك كراونەتەوە

ئاڤا نیوز

بەڕێوەبەرایەتیی كشتوكاڵی هەولێر، بە هاوكاریی ژمارەیەك فەرمانگەی دیكەی پەیوەندیدار، بەردەوامە لە تێكدان و پاككردنەوەی ئەو زەوییانەی دەوروبەری هەولێر كە بە ئاوی پیس داچێندراون و سەوزەیان تێدا بەرهەم دێت.

چیرۆكی سەرەكی: ساڵانێكە لە دەوروبەری هەولێر، ژمارەیەك جووتیار سەرقاڵی بەرهەمهێنانی سەوزەن لەسەر ڕێڕەوی ئاوی پیس، بەڵام بە فەرمانی سەرۆكوەزیران مەسرور بارزانی كۆتایی بەم حاڵەتە دەهێندرێت و سەرپێچیكارانیش ڕووبەڕووی یاسا دەكرێنەوە.

لێدوانی فەرمی: هێمن سەید موراد، بەڕێوەبەری گشتیی كشتوكاڵی هەولێر بە ئاڤا میدیای ڕاگەیاند: ئێمە بەردەوامین لەسەر ڕێگریی زێدەڕۆیی لەسەر زەوییە كشتوكاڵییەكان و زەویی شارەوانی، بە فەرمانی سەرۆكوەزیران مەسرور بارزانی،  بە ئامانجی پاراستنی ژینگە ئەمساڵ زیاتر لە دوو هەزار دۆنم زەویمان لە دەوربەری هەولێر پاك كردەوە.

- زەوییەكان هی شارەوانی بوون و كرداری كوژاندنەوەیان بۆ كرابوو و خاوەنەكانیشیان قەرەبوو كرابوونەوە، بەڵام خەڵكانێك زێدەڕۆییان لەسەر كردبوو.

- زێدەڕۆییەكە بریتی بوو لە بەرهەمهێنانی سەوزە بە ئاوی پیس و قورس، سەرەڕای ئەوەی كە ئەو كەسانە خاوەنی زەوییەكان نەبوون، بەرهەمهێنانەكەشیان بەدەر بوو لە ڕێنمایی و یاساكان.

- 36 كەس بە هۆی ئەو سەرپێچییانەوە ڕادەستی دادگا كراون، ڕێوشوێنی یاساییان لەبەرامبەر گیراوەتە بەر.