سەرۆكی هەرێمی كوردستان بەشداری كۆڕبەندی دەوحە دەكات

ئاڤا نیوز

نێچیرڤان بارزانی، سەرۆكی هەرێمی كوردستان لە مانگی دوازدەی ئەمساڵ بەشداری لە كۆڕبەندی دەوحە دەكات، بۆ ئەم مەبەستەش بانگهێشتنامەی فەرمی لە سەرۆكوەزیرانی قەتەڕەوە پێ گەیشتووە.

وێنە گەورەكە: كۆڕبەندی دەوحە، بە یەكێك لە گەورەترین كۆبوونەوەی ئاستی سەرۆكایەتی وڵاتانی جیهان و ناوچەكە دادەنرێت كە ساڵانە لە دەوحەی پایتەختی قەتەڕ بەڕێوەدەچێت و لەوەتەی ساڵی 2001ـەوە بەردەوامە، ئەمساڵ كۆڕبەندەكە لە ڕۆژانی 6 و 7ـی مانگی كانوونی یەكەم بەڕێوەدەچێت.

بۆچی گرنگە: كۆڕبەندی دەوحە بەسەرپەرشتیی ڕاستەوخۆی ئەمیری قەتەڕ بەڕێوەدەچێت، تێیدا گفتوگۆ لەبارەی گرنگترین پرسە هەنووكەییەكانی سیاسی، دارایی، ئەمنی و ئاسایشی خۆراك دەكرێت، بوونیادنەرانی بڕیارە كاریگەرەكانی جیهان تێیدا بەشدار دەبن.

زانیاریی بەدەستهاتوو: لەمیانی سەردانیكردنی حوسێن بن عەلی ئەلفەزاڵە، كونسوڵی گشتیی قەتەڕ لە هەرێمی كوردستان بۆ لای نێچیرڤان بارزانی، بانگهێشتامەی فەرمی سەرۆكوەزیرانی قەتەڕی بۆ بەشداریكردن لە كۆڕبەندی دەوحە، گەیاندە سەرۆكی هەرێمی كوردستان.

زانیاریی زیاتر: هەرێمی كوردستان پەیوەندیی دۆستایەتیی پتەوی لەگەڵ میرنشینی قەتەڕ هەیە و خواستى بره‌ودان به‌ په‌یوه‌ندییه‌كان و فراوانكردنى هاریكاریى هاوبه‌ش لەگەڵ ئەو وڵاتە دووپات دەكاتەوە.