بەهۆی داخستنی ئاسمانی پاكستان ئاسمانی هەرێمی كوردستان و عێراق بەرناكەوێت

ئاڤا نیوز

 

بە هۆی داخستنی ئاسمانی پاكستان بە ڕووی گەشتە ئاسمانییەكان، ڕێڕەوی فڕۆكەی نەفەرهەڵگری وڵاتان دەگۆڕێت و دەیان فڕۆكە لە یەك كاتدا بەسەر ئاسمانی هەرێمی كوردستان و عێراقدا دەڕۆن و بەڕێوەبەری فڕۆكەخانەی هەولێریش دەڵێت، كاریگەریی بۆ سەر گەشتە ئاسمانییەكان نەبووە.

 

زانیاریی بەدەستهاتوو: بەهۆی شەڕی نێوان هیندستان و پاكستان كە چەند ڕۆژێكە بەرپا بووە، بەهۆی زنجیرەیەك هێرشی هیندستان بۆ سەر چەند بنكەیەكی ئاسمانیی وڵاتەكە، ئەمڕۆ پاكستان بۆ پاراستنی گیانی گەشتیاران و هاونیشتمانیانی، بڕیاری داخستنی ئاسمانی وڵاتەكەی بە ڕووی گەشتی ئاسمانییەکان بۆ ماوەی 24 كاتژمێر، دا.

 

لێدوانی فەرمی: ئەحمەد هۆشیار، بەڕێوەبەری فڕۆكەخانەی نێودەوڵەتیی هەولێر بە ئاڤا میدیای ڕاگەیاند: دۆخەكە هیچ كاریگەرییەكی بۆ سەر گەشتەكانی هەرێمی كوردستان و وڵاتان نەبووە و ئەمڕۆ سەرجەم گەشتە ئاسمانییەكانی فڕۆكەخانەی نێودەوڵەتیی هەولێر لە كاتی دیاركراوی خۆیان دەكرێن.

 

ڕاگەیێنراوی فەرمی: دەسەڵاتی فڕۆكەوانیی پاكستان ڕایگەیاند، گەشتە ئاسمانییەكان تاوەكوو كاتژمێر 12:00ی سبەی یەكشەممە 10-5-2025 دەستپێناكاتەوە.

 

قووڵتر: بەپێی ماڵپەڕی فڵایت ڕادار، كە تایبەتە بە گەشتە ئاسمانییەكان، ئێستا دەیان فڕۆكەی نەفەرهەڵگر ڕێڕەوی خۆیان لە سنووری پاكستانەوە گۆڕیوە و بە ئاسمانی هەرێمی كوردستان و عێراقدا تێپەڕدەبن و دەچنە ئەو وڵاتانەی كە مەبەستیانە و زۆرینەی فڕۆكەكانیش لە هیندستانەوە هەڵفڕیون.