فایلی خەڵک؛ بەهۆی نەبوونی بورج دانیشتوانی دۆڵەڕەقە لە ڕاپەرین ناتوانن تەلەفۆن بەکاربهێنن

ئاڤا نیوز

دانیشتوانی دۆڵەڕەقە لە ئیدارەی ڕاپەڕین، کەمترین کات زەنگی مۆبایلەکانیان لێدەدات، چونکە بەهۆی نەبوونی بورجی کۆمپانیاکانی گەیاندن، لەناو ماڵەکان هێڵی مۆبایل وئینتەرنێت وەک پێویست کار ناکات.

چیرۆکی سەرەکی: دانیشتوانی گوندەکانی دۆڵەڕەقەی سەر بە ناحیەی سەرکەپکان لە ئیدارەی ڕاپەڕین نیگەرانن  و دەڵێن، نە شەبەکەی مۆبایل، نە شەبەکەی ئینتەرنێت، هیچیان نییە، ئەگەر هەشبێ زۆر خراپە. بۆ تەلەفۆن و بەکارهێنانی ئینتەرنێت دەچنە سەر بەرزاییەکان.

زانیاریی پەیامنێر: بەپێی بەدواداچوونی هەنگاو محەممەد پەیامنێری ئاڤا لە سنوورەکە، لە ساڵی 2018 هەوڵێک هەبوو بورجی یەکێک لە کۆمپانیاکانی تەلەفۆن دابنرێ، بەڵام لەبەر ناکۆکی لەسەر شوێنی دانانی بورجەکە، کۆمپانیاکە پەشیمان بوویەوە.

لێدوانی فەرمی: هێمن عەبدوڵڵا، بەڕێوەبەری ناحیەی سەرکەپکان بە ئاڤای وت: هەوڵی نوێ دەدەین بۆ چارەسەرکردنی ئەو کێشەیە.