هاتووچۆی هەولێر دەستبەسەر چەند ئۆتۆمبێلێک دەگرێت

ئاڤا نیوز

 

هاتووچۆی هەولێر، ئەو ئۆتۆمبێلانەی لە شوێنی قەدەغە دەوەستن و زیان بە ژینگە دەگەیێنن دەستیان بەسەردا دەگیرێت.

 

بابەتی سەرەکی: دوای ئەوەی ژمارەیەک ئۆتۆمبێل لەسەر شۆستە و لەنێو سەوزایی چەند شوێنێکی دیکە لە هەولێر وەستابوون، لەلایەن بەڕێوەبەرایەتیی هاتووچۆی هەولێرەوە دەستیان بەسەردا گیرا.

 

لێدوانی فەرمی: عەقید هێمن ئەمین، وتەبێژی بەڕێوەبەرایەتیی هاتووچۆی هەولێر بە ئاڤا میدیای ڕاگەیاند: بەگوێرەی یاسای هاتووچۆ وەستانی ئۆتۆمبێل لە شوێنی قەدەغەدا سزای لەسەرە، سزاکەش بریتییە لە دەستبەسەر داگرتن و پێبژاردن دەبێت.

 

- وتەبێژی بەڕێوەبەرایەتیی هاتووچۆی هەولێر وتیشی: ئەو ئۆتۆمبێلانە لە شوێنی قەدەغەدا وەستاون، بۆیە دەستیان بەسەردا گیراوە و سزای دارایی دەدرێن، هاوکات نووسراو بۆ بەڕێوەبەرایەتیی ئەندازەی پارکەکانیش دەکەین، بۆ ئەوەی بزانین ئایا زیانی بە سەوزایی و گوڵ و دار گەیاندووە، ئەگەر زیانی هەبووبێت، ئەوا ئەندازەی پارکەکانیش لێپێچینەوەی خۆی دەکات.