ڕۆژنامەی حوڕییەت: ئۆجەلان سەرپەرشتی پرۆسەی هەڵوەشاندنەوەی پەکەکە دەکات

ئاڤا نیوز

 

ڕۆژنامەی حوڕییەتی توركی بڵاویكرده‌وه‌، ڕاگەیێنراویی خۆهەڵوەشاندنەوەی پەکەکە ئامادەیە و عەبدوڵڵا ئۆجەلان، ڕێبەری پەکەکە خۆی سەرپەرشتیی پڕۆسەکە دەکات.

 

زانیاریی بەدەستهاتوو: ڕۆژی یه‌كشه‌ممه‌ 11/5/2025، ڕۆژنامەی حوڕییەتی توركی ئاشکرای کردووە، زانیارییان لە بەردەستدایە کە پەکەکە کۆنگرەی ئەنجامداوە و ئێستا هەموو چاوەکان لەسەر ڕاگەیاندنی هەڵوەشاندنەوەی ئەو ڕێکخراوەیە و لە ماوەیەکی کەمدا دەقی ڕاگەیێنراوەکە بڵاودەکرێتەوە.

 

ئەوەی پێویستە بیزانیت: ڕۆژنامەکە ئەوەشی ڕوونکردەوە، سەركردەكانی پەکەکە، بە ڕاوێژکردن لەگەڵ هاوپەیمانەکانی لە سووریا و ئەوروپا گەیشتونەتە رێككەوتن لەسەر دەقی ڕاگەیاندنی خۆهەڵوەشاندنەوە، هاوکات لەگەڵ هەواڵگریی توركیا هەڵسەنگاندنیان كردووە لەكوێ و چۆن ڕاگەیێنراوەكە بڵاوبكەنەوە.

 

زانیاریی زیاتر: پارتی کرێکارانی کوردستان (پەکەکە) لە ڕۆژانی 5 تا 7ـی ئەم مانگە دوانزەهەمین کۆنگرەی خۆی بەست، چاوەڕوان دەکرێت دوای نزیکەی 50 ساڵ شەڕ، لەسەر بانگەوازی عەبدوڵڵا ئۆجەلان و لە چوارچێوەی پرۆسەی ئاشتی، بڕیاری چەکدانان و خۆهەڵوەشاندنەوەی دابێت.