لە سلێمانی بەندکراوێک هاوشێوەی فیلمەکانی هۆڵیوود زیندانییەکان بێزار دەکات

ئاڤا نیوز

لە چاکسازیی گەورانی سلێمانی زیندانییەک کە بەتۆمەتی تیرۆر گیراوە، کراوەتە چاودێر لە قاوشەیەک، بەڵام "هاوشێوەی مافیا هەڵسوکەوت دەکات" و تەواوی زیندانییەکانی بێزار کردووە، تەنانەت سەرانەیان لێ وەردەگرێت. کارگێڕیی زیندانەکە دەڵێن بەدواداچوون دەکەن، وەزارەتی کار و کاروباری کۆمەڵایەتیش پێشتر بڕیاری لادانیان داوە.

چیرۆکی سەرەکی: ژمارەیەک لە بەندکراوانی چاکسازی گەورانی سلێمانی هەزار و 700 بەندکراوی تێدایە، پەیوەندییان بە ئاڤاوە کردووە، وەک خۆیان دەڵێن بەندکراوێک بە ناوی 'یوسف جەدوح' کە بەتۆمەتی تەقینەوەکەی ساڵی 2008ـی پێش هۆتێل پاڵاسی سلێمانی دەستگیرکراوە و لەلایەن دادگا بە حوکمی هەتاهەتایی سزادراوە، نزیکەی دوو ساڵە کراوەتە چاودێر لە یەکێک لە قاوشەکان.

ئێستا یوسف جەدوح لێیان بووەتە "دێوەزمە"، هەڵسوکەتی لەگەڵیان زۆر خراپە، تەنانەت کاتێک  داواکارییەک بەرز دەکەنەوە، بۆنموونە دەیانەوێت جلوبەرگیان لە دەرەوە بۆ بێت، ناوبراو سەرانەیان لێ وەردەگرێت، بڕی پارەکەش بە ئارەزووی خۆی و قەبارەی داواکارییەکە دیاری دەکات لە 50 هەزارەوە بۆ 300 هەزار دینار.

لێدوانی فەرمی: سەرچاوەیەکی باڵا لە چاکسازی گەورانی سلێمانی بە ئاڤا میدیای ڕاگەیاند: "ئەو بەندکراوانە ئەگەر دەتوانن بە بەڵگە بیسەلمێنن کە یوسف پارەی لێ وەرگرتوون، ئەوا لیژنەی لەسەر پێکدەهێنن و لێپێچینەوەی لەگەڵ دەکەن، سبەی دووشەممەش بەدواداچوون لەسەر ئەم بابەتە دەکەن".

بەوتەی سەرچاوەکەی چاکسازی گەورانی سلێمانی، ساڵ و نیوێکە یوسف جەدوح کراوە بە چاودێر، دەبوو ئەو بەندکراوانە لای ئەوان سکاڵای لەسەر تۆمار بکەن، نەک خۆیان بێدەنگ بکەن.

لەلایەکی دیکەوە: ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان کە سەر بە وەزارەتی کار و کاروباری کۆمەڵایەتییە، بە ئاڤا میدیای ڕاگەیاند: بەدواداچوون لەسەر ئەم بابەتە دەکەین،  پێشتر چاکسازیی گەورانی سلێمانی ئاگادارکرابوونەوە کە یوسف جەدوح لە چاودێری نەهێڵن، واتا ئێستا چاودێر نییە.