ئەمریکا ڕێککەوتنی بازرگانی لەگەڵ چین لە جنێڤ ڕادەگەیێنێت

ئاڤا نیوز

جێگری سەرۆک وەزیرانی چین، هی لیفینگ، ڕۆژی یەکشەممە جارێکی دیکە لەگەڵ سکۆت بێسنت، وەزیری گەنجینەی ئەمریکا و جەیمیسۆن گریر، نوێنەری بازرگانی ئەمریکا کۆبووەوە.

وێنە گەورەکە: دوای سەپاندنی گومرگی زیادە بە ڕێژەی زیاتر لە 100% لەلایەن ئەمریکا و چین لەسەر کاڵاکانی یەکتر، ئەو دوو وڵاتە بۆ چارەسەرکردنی ناکۆکییەکانیان یەکەم کۆبوونەوەیان ئەنجامدا.

لێدوانە فەرمییەکان: 

٠ دۆناڵد ترەمپ، سەرۆکی ئەمریکا ڕایگەیاند، لە سوویسرا شاندی ئەمریکا لەگەڵ شاندی چین کۆبوونەوەیەکی باشیان ئەنجامداوە، لە کۆبوونەوەکە زۆر شت باسیان لێوەکراوە، زۆر لێی ڕازی بووین. دانوستانەکەمان لەگەڵ چین زۆر هاوڕێیانە و بوونیادنەر بووە، ئەم گفتوگۆیانە سوودی بۆ هەردوولا دەبێت.

٠ هاوارد لوتنیک، وەزیری بازرگانی ئەمریکا، ڕایگەیاند، ئەمریکا گەشبینە سەبارەت بە دانوستانەکان لەگەڵ چین بە ئامانجی کەمکردنەوەی گرژییە بازرگانییەکان کە بەهۆی سەپاندنی گومرگ لەلایەن  دۆناڵد ترەمپەوە دروستبوون.

ڕاگەیێنراوی فەرمی: کۆشکی سپی ئەنجامی کۆبوونەوەی ئەمریکا و چینی بڵاوکردەوە و لە ڕاگەیێنراوەکەی کۆشکی سپی، سکۆت بێسنت وەزیری گەنجینەی ئەمریکا ڕایگەیاند، پێشکەوتنی بەرچاوییان لە کۆبوونەوەیان لەگەڵ چین بەدەستهێناوە و گفتوگۆکانمان بەرهەمدار بووە.

جەیمسۆن گریر باڵیۆزی بازرگانی ئەمریکاش دەڵێت، دڵنیاین ئەو گرێبەستەی لەگەڵ هاوبەشە چینییەکانمان کردمان یارمەتیدەرمان دەبێت.

لەلایەکی دیکەوە: ئاژانسی هەواڵی چینی، بڵاویکردووەتەوە دانوستانەکانی بازرگانی نێوان پەکین و واشنتن لە جنێف هەنگاوێکی گرنگە بۆ دۆزینەوەی چارەسەرێک بۆ ئەو جەنگە بازرگانییەی لە نێوان پەکین و واشنتن بەهۆی سەپاندنی گومرگی زیادەوە هاتووەتە ئاراوە.