شەپۆلێکی دیکەی خۆڵبارین عێراق و هەرێمی کوردستان دەگرێتەوە

ئاڤا نیوز

شەپۆلێکی خۆڵبارین جارێکی دیکە ڕوو لە شارە جیاوازەکانی عێراق و هەرێمی کوردستان دەکات و داواش لە هاووڵاتییان و شۆفێران دەکرێت ڕێوشوێنی خۆپارێزی بگرنەبەر.

ڕاگەیێنراوی فەرمی: دەستەی کەشناسی و بوومەلەرزەزانی عێراق ڕایگەیاند: خۆڵبارینێکی چڕ ڕووی لە ناوچەکانی ڕۆژئاوای عێراق کردووە، بەو هۆیەشەوە ئاستی بینینی ئاسۆیی بۆ کەمتر لە یەک کیلۆمەتر لە زۆربەی ناوچەکانی ڕۆژئاوا کەمبووەتەوە، لە ئێوارە و شەوەوە زریانەکە ناوچەکانی باشوور و ناوەڕاست لەوانەش بەغدا دەگرێتەوە بەڵـام ئاستی بینین باشتر دەبێت بە بەراورد لەگەڵ ناوچەکانی ڕۆژئاوادا.

ئەوەی پێشبینی دەکرێت: ئەگەر هەیە ڕۆژی سێشەممە 13ـی ئایار، خۆڵبارینەکە شارەکانی هەرێمی کوردستانیش بگرێتەوە.

لێدوانی فەرمی: شێخ دارا، پێشکەشکار و شارەزای کەشوهەوا لە ئاڤا میدیا ڕایگەیاند: ئەمشەو خۆڵبارینەکە ڕوو لە هەرێمی کوردستان دەکات بەڵام لاوازە، لە بەرامبەردا لە ناوەڕاست تا خوارووی عێراق خۆڵبارینەکە زۆرە و کەم کەمەش باران دەبارێت.

زانیاریی زیاتر: دەستەکە هۆشداریدا لە کەمبوونەوەی بینینی ئاسۆیی و داوای لەو کەسانە کردووە کە نەخۆشی هەناسەدانیان هەیە و بەساڵاچوون، خۆیان بەدوور بگرن لە بەرکەوتن و لە ماڵەوە بمێننەوە، داواشی لە شۆفێران کردووە وریابن بە تایبەت لەسەر ڕێگا خێراکان و شوێنە کراوەکاندا.

ئەوەی پێویستە بیزانیت: لە هەفتەی ڕابردوو بۆ ماوەی چەند ڕۆژێک، زریانێکی چڕی خۆڵبارین شارەکانی عێراق و هەرێمی کوردستانی گرتەوە و سەدان هاووڵاتی تووشی هەناسەتەنگی بوون و بەشێکی زۆریان ڕەوانەی نەخۆشخانە کران.