وڵاتانی ئەوروپا ئامادەکاری بۆ سەپاندی سزای نوێ بەسەر ڕووسیادا دەکەن

ئاڤا نیوز

لە ئەگەری قبووڵنەکردنی ئاگربەستی 30 ڕۆژە لەگەڵ ئۆکراینا کە بڕیارە ئەمڕۆ دەستپێبکات، وڵاتانی ئەوروپا ئامادەکاری بۆ سەپاندنی سزای نوێ بەسەر ڕووسیا دەکەن.

چیرۆکی سەرەکی: سەرکردەکانی چوار وڵاتی ئەوروپا، فەرەنسا، بەریتانیا، پۆڵەندا و ئەڵمانیا، ڕۆژی شەممە لە کیێڤ کۆبوونەوە و داوای ئاگربەستی بێ مەرجیان کرد لەنێوان ڕووسیا و ئۆکراینا بۆ ماوەی 30 ڕۆژ، ڤلادیمیر پووتین، سەرۆکی ڕووسیاش بەشێوەیەکی ناڕاستەوخۆ پێشنیازەکەی ڕەتکردوە، لەبەرامبەردا ئامادەیی بۆ دانووستانی ڕاستەوخۆ لەگەڵ ئۆکراینا دەربڕی، ئەمەشی بە هەنگاوێک بەرەو ئاگربەست وەسف کرد.

هەنگاوی داهاتوو: وڵاتانی ئەوروپا لە ئەگەری پابەند نەبوونی ڕووسیا بە ئاگربەستی 30 ڕۆژە، جەختیان لە سەپاندی سزای نوێ بەسەر وڵاتەکەدا کردەوە. ڤۆلۆدیمێر زێلێنسکی، سەرۆکی ئۆکرایناش شەوی ڕابردوو ڕایگەیاند، پێشنیازی ئاگربەست هێشتا لەسەر مێزە و چاوەڕێی وەڵامی مۆسکۆ دەکات.

ئەوەی پێویستە بیزانیت: لە ساڵی 2019ـەوە پووتین و زێلێنسکی کۆنەبوونەتەوە، لە ماوەکانی ڕابردووشدا سەرۆکی ڕووسیا پێشنیازی بۆ سەرۆکی ئۆکراینا کرد ڕاستەوخۆ دانووستان بکەن، کۆبوونەوەکەش لە تورکیا بێت، دوای ڕەزامەندی ڕەجەب تەیب ئەردۆغان، سەرۆککۆماری تورکیا، داواکەی پووتین قەبووڵ کرا و زێلێنسکی ئامادەیی بۆ کۆبوونەوەکە دەربڕی، ئەگەر بۆچونی هیچ کامێکیان نەگۆڕێت، بڕیارە 15ـی ئەم مانگە لە ئیستەنبووڵ کۆببنەوە.

باکگراوند: نزیکە سێ ساڵە جەنگی نێوان ڕووسیا و ئۆکراینا بەردەوامە، تاوەکو ئێستاش ئاگربەستێکی ماوەدرێژ لەنێوانیاندا نەهاتووەتە ئاراوە. پێشتر پووتین ئاگربەستێکی کاتی ڕاگەیاند لە ڕۆژانی 8 تا 10ـی ئەم مانگە، لەو ماوەیەشدا هیچ هێرشێک لەلایەن ڕووسیاوە نەکرا، لەبەرامبەردا ئۆکراینا ڕەخنەی لە ئاگربەستەکە گرت و ڕایگەیاند، بۆچی پابەندی ئاگربەستی 30 ڕۆژە نابێت و ئەم جەنگە ڕابگرێت.