تورکیا، سووریا و ئوردن لەبارەی گۆڕانکارییەکانی ناوچەکە کۆبوونەوە

ئاڤا نیوز

وەزیری دەرەوەی تورکیا و هاوتا سوورییەکەی لە کۆنگرەیەکی ڕۆژنامەوانییەکی هاوبەشدا، بڕیارەکەی پەکەکە بە چەکدانان بە "مێژوویی و گرنگ" ناودەبەن.

چیرۆکی سەرەکی: ئەمڕۆ دووشەممە، هاکان فیدان، وەزیری دەرەوەی تورکیا ئەسعەد شەیبانی و ئەیمەن سەفدی هەردوو هاوتا سووری و ئوردنییەکەی لە ئەنقەرە کۆبوونەوە و باسیان لە پێشهاتەکانی ناوچەکە و بارودۆخی ئەمنیی ناوچەکە کرد و دواتر کۆنگرەیەکی ڕۆژنامەوانیی هاوبەشیان ئەنجامدا.

لێدوانە فەرمییەکان:

هاکان فیدان، وەزیری دەرەوەی تورکیا ڕایگەیاند:

٠ بڕیاری پەکەکە بۆ دانانی چەک مێژووییە و زۆر گرنگە بۆ هەرێمەکەمان، سەبارەت بە جێبەجێکردنی بڕیارەکەش وردەکاریی زۆر هەیە.

٠ لە هەموو بوارەکاندا هاوکاریی سووریا دەکەین.

٠ لەشکرکێشی ئیسرائیل بۆ ناو سووریا ئاسایش و سەقامگیری تێکدەدات و هەڕەشەیە بۆ سەر داهاتووی سووریا.

٠ چاودێریی دۆخی غەززە دەکەین و ئەوەی ڕوودەدات کارەساتی مرۆییە پێویستە ڕابگیرێت.

ئەسعەد شەیبانی، وەزیری دەرەوەی سووریا ڕایگەیاند:

٠ بە ناوی کۆماری عەرەبیی سووریا پیرۆزبایی لە حکومەت و گەلی تورکیا دەکەم بە بۆنەی بڕیاری پەکەکە بە چەکدانان کە هەنگاوێکی گرنگە بۆ ناوچەکە.

٠ خەریکی جێبەجێکردنی ڕێککەوتنی یەکخستنی هێزەکانی سووریای دیموکراتین لەژێر چەتری وەزارەتی بەرگریی حکومەت، دواخستن جێبەجێکردنی ڕێککەوتنەکە لەگەڵ هەسەدە مەیلی جوداخوازی دروست دەکات.

٠ ئیسرائیل بەردەوام سنوورمان پێشێل دەکات، هێرشە ئاسمانییەکانی ئیسرائیل بۆ سەر خاکمان، پەرەسەندنێکی مەبەستدارە و سەقامگیری تێکدەدات و ناوچەکە بەرەو ململانێ دەبات.

٠ باڵیۆزخانەمان لە ئەنقەرە دەکەینەوە، هاوکات کۆنسوڵخانەیەک لە غازی عەنتاب دەکەینەوە.

ئەیمەن سەفدی، وەزیری دەرەوەی شانشینی ئوردن ڕایگەیاند:

٠ پشتیوانیی سووریا دەکەین و سەقامگیری لەو وڵاتە پایەیەکی سەقامگیرییە لە ناوچەکەدا، ئەمڕۆ تاوتویێ هەنگاوی کردارییمان کرد بۆ هاوکاریکردنی برایانی سووریمان، هاوکات تاوتوێی میکانیزمەکانی بەرەنگاربوونەوەی ڕێکخراوی داعشی تیرۆریستمان لەو وڵاتەدا کردەوە.

٠ سەرەکیترین ئاڵنگاری ڕووبەڕووی سووریا ببێتەوە دەستدرێژییەکانی ئیسرائیلە و هەوڵەکانیەتی بۆ دروستکردنی ئاژاوەگێڕی و جوداخوازی کە ئەم مافەی نییە، لەمبارەیەوە هەماهەنگی لەگەڵ کۆمەڵگەی نێودەوڵەتی دەکەین بۆ ڕاگرتنی دەستوەردانی ئیسرائیل لە سووریا.

٠ دەستدرێژییەکانی ئیسرائیل بۆ سەر غەززە دەبێت ڕابگیرێت، ئیسرائیل ڕێککەوتننامە نێودەوڵەتییەکان و بەها مرۆییەکان پێشێل دەکات.

٠ ئازادکردنی "ئیدان ئەلکسەندەر" هەنگاوێکە دەبێت ببێتە مایەی ڕێککەوتنێکی گشتگیری ڕاگرتنی شەڕ لە کەرتی غەززە و هەناردنی هاوکاریی مرۆیی بۆ کەرتەکە.