لە بانکێکی دیالە زیاتر لە دوو ملیار دینار دەبردرێت

ئاڤا نیوز

چوار کارمەندی بانکێکی حکومی لە پارێزگای دیالە زیاتر لە دوو ملیار دیناریان بەشێوەیەکی نایاسایی بردووە، دواتر دەستگیرکراون.

وێنە گەورەکە: گەندەڵی لە دوای ساڵی 2003ـەوە لە عێراق لە هەموو دامەزراوەکانی حکومەت بووەتە دیاردە، دەستەی دەستپاکیش ماوە ماوە دۆسییە گومانلێکراوەکان هەڵدەداتەوە، دواتریش دۆسییەکان ئاراستەی دادگا دەکات.

ڕاگەیێنراوی فەرمی: دەستەی دەستپاکی لە ڕاگەیێنراوێکدا ڕایگەیاند: چوار لە کاشێر و کارمەندانی هەژمارتن لە لقی بەعقووبەی بانکی ڕافیدەین بەشێوەیەکی نایاسایی بڕی دوو ملیار و 221 ملیۆن و 368 هەزار و 55 دیناریان لە هەژماری دیوانی پارێزگاکە خەرج کردووە و لە ڕێگەی فەرمانبەرانی ژمێریاری بڕە پارەکە بردراوە.

بەپێی ڕاگەیێنراوەکەی دەستەی دەستپاکی، ئەو بڕە پارەیە بەپێی 25 چەک خەرجکراوە.

ئەوەی پێویستە بیزانیت: لە مانگی نیسانی ساڵی 2024، پێنج ژمێریار لە دیوانی پارێزگای دیالە دەستگیرکران کە زیاتر لە ملیارێک و 600 ملیۆن دیناریان لە هەژماری پارێزگاکە لە بانکی ڕافیدەین بردبوو، هەروەها دەستبەسەر زیاتر لە 600 ملیۆن دینار و زەڕەنگەری زێڕ و بەڵگەنامە و چەکی خانووبەرەدا گیرا.