لە ئەنبار چەکدارانی داعش هێرش دەکەنە سەر شوانکاران

ئاڤا نیوز

چەكدارانی داعش لە بیبانەکانی پارێزگای ئەنبار، هێرش دەکەنە سەر چەند شوانکارێک و ئۆتۆمبێلەکانیان دەسوتێنن.

وێنە گەورەکە: هەرچەندە لە ساڵی 2017ـەوە کۆتاییهاتنی داعش وەکو ڕێکخراوێک ڕاگەیێنراوە، بەڵام شانە نوستووەکانی ڕێکخراوەکە ماون و هەندێکجار هێزە ئەمنییەکان و هاووڵاتیانی عێراق بەئامانج دەگرن.

لێدوانی فەرمی: عەبدوڵڵا جوغیفی، ڕاوێژکاری پارێزگاری ئەنبار بۆ کاروباری ئاسایش و بەرگری و حەشدی شەعبی، ڕایگەیاند: بەرەبەیانی ئەمڕۆ 13-5-2025 چەکدارانی داعش هێرشیان کردووەتە سەر چەند شوانکارێک لە ناوچەی زەبعات لە بیابانەکانی ڕۆژئاوای ئەنبار، دوای ئەوەی ڕووبەڕووبونەوەی چەکداری لەنێوانیان ڕوودەدات، چونکە شوانکارەکان خۆیان چەکیان پێبووە و بەرگرییان کردووە، لەئاکامدا چەکدارانی داعش چەند ئۆتۆمبێلێکی شوانکارەکان دەسوتێنن.

- داعش بۆ كردە تیرۆریستییەكانیان، ئەو ناوچانە بەكار دێنێت كە تاوەکو ئێستا بۆشایی ئەمنی تێدایە و هێزی ئەمنی لەو شوێنانە جێگیرنەکراوە.

لەلایەکی دیکەوە: عیماد ڕیشاوی، قایمقامی قەزای ڕوتبە لەڕۆژئاوای ئەنبار بەئاڤا میدیای ڕاگەیاند: چەکدارانی داعش هێرشیان کردووەتە سەر چەند شوانکارێک لە ڕۆژئاوای ئەنبار و پێنج ئۆتۆمبێلی شوانکارەکانیان سوتاندووە و هێزە ئەمنییەکانی پارێزگاکەش هەڵمەتێکی فراوانیان بۆ ڕاوەدونان و دەستگیرکردنی ئەو چەکدارانەی داعش دەستپێکردووە.