بەریتانیا و فەرەنسا لەڕێگەی ئاڤاوە هەڵوێستی خۆیان لەبارەی چەکدانانی پەکەکە ئاشکرا دەکەن

ئاڤا نیوز

 

هەریەک لە بەریتانیا و فەرەنسا پێشوازی لە ڕاگەیێنراوی کۆنگرەی پەکەکە بۆ چەکدانان و خۆهەڵوەشداندنەوە دەکەن و بە "هەنگاوێکی گرنگی دەزانن."

 

وێنە گەورەکە: بڕیاری پەکەکە بۆ چەکدانان و خۆهەڵوەشاندنەوە بە قۆناغێکی نوێ و گرنگ دادەنرێت بۆ کورد لە باکووری کوردستان و تورکیا، نەمانی شەڕ و سەرکەوتووبوونی پرۆسەی ئاشتی دەبێتە هۆی سەقامگیری بۆ هەرچوار پارچەی کوردستان و تەواوی ڕۆژهەڵاتی ناوەڕاست، بۆیە زۆربەی وڵاتانی جیهان پێشوازی و پشتیوانی لێ دەکەن و بە دەرفەتێکی مێژوویی دەبینن.

لێدوانی فەرمی: باڵیۆزخانەی بەریتانیا لە عێراق بە ئاڤای ڕاگەیاند،  بڕیاری پەکەکە بۆ داماڵینی چەک و خۆهەڵوەشاندنەوە هەنگاوێکی گرنگە بەرەو ئاشتی و ئاسایش بۆ خەڵکی تورکیا و ناوچەکە هەمووی. باڵیۆخانەکە دەڵێت، بەردەوام لە نزیکەوە چاودێریی ئەو پێشهاتانە دەکەن کە لە ناوچەکەدا ڕوودەدەن. جەختیش دەکاتەوە پابەندە بە پشتیوانیکردنی ئەو هەوڵانەی ململانێکان کەم دەکەنەوە و سەقامگیری بەرەوپێش دەبەن.

 

لەلایەکی دیکە: سەرچاوەیەکی دیپلۆماسی لە حکومەتی فەڕەنسا بە ئاڤای گوت، وڵاتەکەی پێشوازی لە بڕیارەکانی پەکەکە دەکات، کە یەکێکە لەو ڕێکخراوانەی لە لیستی ڕێکخراوە تیرۆرستییەکانی ئەوروپادایە.

فەرەنسا هیوادارە "خۆهەڵوەشاندنەوەی پەکەکە کاریگەر بێت و جێبەجێ بکرێت، ببێتە هۆی پرۆسەیەکی سیاسی گشتگیر لەسەر بنەمای دیموکراسی و سەروەریی یاسا". لە دیدی فەرەنسییەکان چەکدانانی پەکەکە "لاپەڕەیەکی نوێ هەڵدەداتەوە و بەشێوەیەکی یەکلاکەرەوە کۆتایی بە شەڕ و تووندوتیژی دێت".

باکگراوند: دوای بانگەوازەکەی عەبدوڵڵا ئۆجەلان لە 27-2ی ئەمساڵ، بەراوری 5 بۆ 7ی ئەم مانگە پەکەکە 12ـیەمین کۆنگرەی خۆی بەست، ڕۆژی 12 مانگیش بڕیارەکانی کۆنگرەی ئاشکرا کرد و ڕایگەیاند، خۆیان هەڵدەوەشێننەوە و کۆتایی بە خەباتی چەکداری دەهێنن، ئەمەش کاردانەوەی ناوخۆیی و جیهانی بەدوای خۆیدا هێنا و زۆربەی وڵاتان پێشوازی لەو بڕیارەدەکەن.