کەشناسی: باران و خۆڵبارین و بەرزبوونەوەی پلەکانی گەرما بەردەوام دەبن

ئاڤا نیوز

دەستەی کەشناسی عێراق ڕایگەیاند، لە ئەمڕۆوە تا یەکشەممەی داهاتوو ماوە ماوە باران دەبارێت و خۆڵبارینیش لە ڕۆژهەڵاتەوە بەرەو ناوەڕاست و باشووری عێراق بەردەوام دەبێت، هاوکات پلەکانی گەرماش زیاتر بەرزدەبنەوە.

وێنە گەورەکە: ماوەی چەند ڕۆژێکە شەپۆلێکی خۆڵبارین پارێزگاکانی عێراق و هەرێمی کوردستانی گرتووەتەوە، هاوکات لەو ماوەیەدا ناوەناوە بارانبارین بە بڕی کەم لە ناوچە جیاوازەکان باریووە.

ڕاگەیێنراوی فەرمی: دەستەی کەشناسی عێراق بڵاویکردەوە، ڕۆژانی پێنجشەممە، هەینی، شەممە و یەکشەممەی داهاتوو ئاسمان لەنێوان هەور و هەتاودا دەبێت، هاوکات لەو ماوەیەدا شەپۆلی خۆڵبارین بەردەوام دەبێت.

بەگوێرەی کەشناسی، لەو ماوەیەدا پلەکانی گەرماش بەرزدەبنەوە، لەوانەش سبەی پێنجشەممە نزمترین پلەی گەرما لە دهۆک دەبێت کە 27پلەیە، پارێزگای بەسرەش بە تۆمارکردنی 44 پلە بەرزترین پلەی گەرمی تێدا تۆمار دەکرێت.