سوودانی نامەیەکی لە نەتەوەیەکگرتووەکانەوە لەبارەی کەمپی هۆل پێدەگات

ئاڤا نیوز

نوێنەری تایبەتی ئەمینداری گشتی نەتەوە یەکگرتووەکان نامەیەکی ئەمینداری گشتی نەتەوە یەکگرتووەکان لەبارەی کەمپی هۆل ڕادەستی سەرۆکوەزیرانی عێراق دەکات.

چیرۆکی سەرەکی: محەممەد شیاع سوودانی، سەرۆکوەزیرانی عێراق لە بەغدا پێشوازی لە محەممەد ئەلحەسسان، نوێنەری تایبەتی ئەمینداری گشتی نەتەوە یەکگرتووەکان کرد.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، لە میانی دیدارەکە ڕێڕەوی هەماهەنگی نێوان عێراق و ڕێکخراوە نێودەوڵەتییەکان و بارودۆخی ناوچەکە و دیارترین ئەو دۆسیانەی کە لە سی و چوارەمین لووتکەی عەرەبیدا کە ڕۆژی شەممەی داهاتوو بەغدای پایتەخت میوانداری دەکات و لووتکە هاوشێوەکان تاوتوێ کران.

زانیاریی زیاتر: سوودانی ئاماژەی بە گرنگی ڕۆڵی نێردەی نەتەوە یەکگرتووەکان لە عێراق و نوێنەری تایبەتی ئەمینداری گشتی کرد و ئەو پرۆگرامانەی کە بە هەماهەنگی لەگەڵ حکومەت سەرپەرشتی دەکرێن و جەختی لەسەر پابەندبوونی عێراق بە بەردەوامی هەماهەنگی هاوبەش و پێویستی ناوچەکە بە پەرەپێدانی دیالۆگ کردەوە، بە مەبەستی ڕەخساندنی دەرفەتی زیاتر بۆ گەشەپێدانی بەردەوام.

لەلایەکی دیکەوە: ئەلحەسسان نامەیەکی، ئەنتۆنیۆ گۆتێرێز، ئەمینداری گشتی نەتەوە یەکگرتووەکانی ڕادەستی سەرۆکوەزیران کرد و تێیدا ستایشی هەوڵە خێراکانی ئەم دواییەی عێراقی کرد بۆ گەڕاندنەوەی هاووڵاتیانی عێراقی لە کەمپەکانی هۆل و ڕۆج و گرتووخانەکانی سووریا و گرنگی تەرخانکردنی سەرچاوەکان بۆ بەردەوامی پرۆسەی چاکسازی و سەرلەنوێ تێکەڵبوونەوەیان لەنێو کۆمەڵگا.

ئەوەی پێویستە بیزانیت: بەگوێرەی ئامارەکانی وەزارەتی کۆچ و کۆچبەرانی عێراق، زیاتر لە 14 هەزار کەس لە ژن و منداڵی چەکدارانی داعش لە ماوەی چوار ساڵی ڕابردوو لە کەمپی هۆلەوە گواستراونەتەوە عێراق و پرۆسەکەش بەردەوامە.

باکگراوند: کەمپی هۆل دەکەوێتە پارێزگای حەسەکە لە ڕۆژئاوای کوردستان و ئیدارەی خۆبەڕێوەبەری سووریا (خۆسەر) سەرپەرشتی دەکات، نزیکەی 43 هەزار چەکداری پێشوو و ژن و منداڵی ئەندامانی داعش لەو کەمپە کۆکراونەتەوە، 18 هەزاریان عێراقین، بەغداش جەخت لە گەڕانەوەی هەموویان دەکاتەوە.