بڕیاری قەدەغەکردنی کارکردنی کرێکارانی پێنج وڵات هەرێمی کوردستان ناگرێتەوە

ئاڤا نیوز

وەزارەتی کاری عێراق بڕیارێکی دەرکردووە سەبارەت بە کرێکاری پێنج وڵاتی جیهان، بە گوێرەی بڕیارەکە چیتر ناتوانن لە عێراق کار بکەن، ئەو بڕیارە هەرێمی کوردستان ناگرێتەوە.

چیرۆکی سەرەکی: بەپێی بڕیارەکە کرێکارانی وڵاتەکانی، سووریا، ئێندۆنیزیا، پاكستان، بەنگلادیش و فلیپین، ناتوانن بەمەبەستی کارکردن بێنە عێراق و بمێننەوە، ئەو کۆمپانیایانەی کاری هێنانی کرێکاری بیانی دەکەن، چیتر ناتوانن کرێکاری ئەو پێنج وڵاتە بهێننە عێراق.

لێدوانی فەرمی: د. ناجی عەلی، بەڕێوەبەری بەكارخستن لە وەزارەتی كار و كاروباری كۆمەڵایەتی بە ئاڤای گوت، "لیژنەیەکی باڵا لەسەر ئاستی وەزارەت پەیوەستە بەو بابەتە، ئەو بڕیارەی لە عێراق دەرچووە هەرێمی کوردستان ناگرێتەوە، کرێکاری هەر وڵاتێک کارکردنی قەدەغە بکرێت، لەلایەن وەزارەتی ناوخۆەوە ڕێنماییمان لەبارەی پێدەگات."

ئەوەی پێویستە بیزانیت: بە بڕیاری ژمارە 172ـی ئەنجوومەنی وەزیرانی هەرێمی کوردستان، هەر کۆمپانیایەکی ناوخۆیی، یان بیانی لە هەرێمی  کوردستان کار بکات و بیەوێت کرێکاری بیانی بهێنێت، دەبێت 75٪ـی کرێکارەکانی خەڵکی ناوخۆی هەرێمی کوردستان بن و بۆی هەیە تەنیا 25٪ـی کرێکارەکانی بیانی بن.