زێلێنسکی بۆ دانوستاندنی ڕاستەوخۆ لەگەڵ ڕووسیا گەیشتە تورکیا

ئاڤا نیوز

 

ڤۆلۆدیمێر زێلێنسکی، سەرۆکی ئۆکراینا گەیشتە تورکیا و بڕیارە لەگەڵ سەرۆککۆماری تورکیا لە ئەنقەرە کۆببێتەوە.

 

وێنە گەورەکە: ڕۆژی پێنجشەممە، 15-5-2025، دوای سێ ساڵ لە جەنگ و وێرانکاری بەردەوام، بڕیارە یەکەمین دانوستاندنی ڕاستەوخۆی نێوان مۆسکۆ و کیێڤ لە ئیستەنبووڵ بەڕێوەبچێت.

 

ئێستا چی ڕوودەدات: ڤۆلۆدیمێر زێلێنسکی، سەرۆکی ئۆکراینا گەیشتە تورکیا و بڕیارە لەگەڵ ڕەجەب تەیب ئەردۆغان، سەرۆککۆماری تورکیا لە ئەنقەرە کۆببێتەوە و تاوتوێی هەنگاوەکانی دانوستاندنەکان بۆ کۆتاییهێنان بە شەڕی سێ ساڵەی نێوان ئۆکراینا و ڕووسیا بکەن.

 

ئەوەی پێویستە بیزانیت: بڕیاربوو ڤلادیمێر پووتین، سەرۆکی ڕووسیا لە دانوستاندنەکان لەگەڵ ڤلادیمێر زێلێنسکی بۆ کۆتاییهێنان بەشەڕی ئۆکراینا کۆببنەوە، بەڵام کرێملن ڕایگەیاند، پووتین سەردانی تورکیا ناکات و بەشداریی دانوستاندنەکان ناکات.

 

لەلایەکی دیکەوە: دۆناڵد ترەمپ، سەرۆکی ئەمریکا ئەمڕۆ لە دەوحەی پایتەختی قەتەر ڕایگەیاند: "بە وردی چاودێریی کۆبوونەوەی ئەمڕۆی نێوان ڕووسیا و ئۆکراینا دەکەم، پێویستە ئەم جەنگە کۆتایی پێبهێنرێت، چونکە هەموو هەفتەیەک پێنج هەزار گەنج دەکوژرێن، ناکرێت ئەم وێرانکارییە بەردەوام بێت، دەبێت ئەم جەنگە بوەستێنرێت."