زیاتر لە ملیارێک و 250 ملیۆن دینار لە گومرگی بەسرە دەدزرێت

ئاڤا نیوز

دەستەی دەستپاکیی عێراق دەستگیرکردنی خەزنەدارێکی پێشووی گومرگی بەسرەی ڕاگەیاند کە تۆمەتبارە بە دزینی زیاتر لە ملیارێک و 250 ملیۆن دینار لە داهاتی گومری بەسرە.

وێنە گەورەکە: لە دوای ساڵی 2003 گەندەڵی لە عێراق بووەتە باوترین دیاردە و سەرجەم دامەزراوەکانی دەوڵەتی گرتووەتەوە، ئێستاش گەیشتووەتە ئاستێكی مەترسیدار و حکومەت ناتوانێت بنبڕی بکات.

ڕاگەیێنراوی فەرمی: دەستەی دەستپاکیی عێراق لە ڕاگەیێنراوێکدا دەڵێت: دوای وردبینیکردنی داهات و پارەی سپاردەی تایبەت بە ناوەندی گومرگی شەلامچە و گومرگی فڕۆکەخانەی نێودەوڵەتیی بەسرە و ناوەندە گومرگییەکانی (سەفوان، ئوم قەسری ناوەند و گۆڕەپانی گەورەی پێشوازیی بەندەرەکانی ئوم قەسر) بۆ ساڵەکانی (2022 و 2023 و 2024). دەرکەوت بڕی ملیارێک و 229 ملیۆن و 501 هەزار دینار لەو داهاتە دیار نەماوە.

زانیاریی زیاتر: بەگوێرەی دەستەی دەستپاکیی، دەرکەوت کە خەزنەداری "ئەمین سندووقی" پێشوو لە بەڕێوەبەرایەتی گومرگی ناوچەی باشوور ئەو کەسەیە کە دەستی لە دزینی ئەو پارەیە هەیە، بۆیە بڕیارێکی دادوەری بۆ دەستگیرکردنی ئەو تۆمەتبارە دەرچوو، دواتر توانرا دەستگیر بکرێت.