بە بەشداری سەرۆکوەزیران مەسرور بارزانی دووەم ڕۆژی لووتکەی حکومەتەکانی جیهان بەڕێوەدەچێت

ئاڤا نیوز

ئەمڕۆ، مەسرور بارزانی سەرۆکوەزیرانی کوردستان، لە دووەم ڕۆژی لووتکەی حکومەتەکانی جیهان، لە دوبەی لەگەڵ ژمارەیەک سەرۆک و سەرکردەی بەشدار لە لووتکەکە کۆدەبێتەوە. 

لێدوانی فەرمی: کوردستان حەسەن، پەیامنێری دیپلۆماسی ئاڤا، لە دوبەی، گوتی: "سەرۆکوەزیران مەسرور بارزانی، هاوشێوەی دوێنێ، ئەمڕۆش لەگەڵ ژمارەیەک سەرۆک و سەرکردەی بەشدار لە لووتکەی حکومەتەکانی جیهان کۆدەبیتەوە."

کوردستان حەسەن، ئەوەشی وت: "سەر لە بەیانی ئەمڕۆ سەرۆکوەزیران مەسرور بارزانی، لەگەڵ ئەمینداری گشتیی کۆمکاری عەرەبی کۆبووەوە."

زانیاریی زیاتر: لە ژێر دروشمی "دیدگای حکوومەتەکانی داهاتوو"، لووتکەی جیهانیی حکومەتەکان لە دوبەی دەستی پێ کردووە و ماوەی سێ ڕۆژ بەردەوام دەبێت؛ تێیدا زیاتر لە 60 سەرۆک دەوڵەت و حکوومەت، نوێنەرانی 150 حکوومەت، زیاتر لە 500 وەزیری وڵاتە بەشداربووەکان و ژمارەیەک لە گەورە بیرمەند و شارەزایانی جیهانی بەشدار دەبن.

ئەوەی پێویستە بیزانیت: سەرۆک وەزیران مەسرور بارزانی لەگەڵ هەریەک لە لەگەڵ جەعفەر حەسسان سەرۆکوەزیرانی ئوردن، شێخ سەیف بن زاید ئال نەهیان جێگری سەرۆک وەزیران و وەزیری ناوخۆی ئیمارات، ئیراکلی کۆباخیدزە سەرۆکوەزیرانی گورجستان (جۆرجیا)، شێخ محەمەد بن زاید ئال نەهیان سەرۆکی میرنشینی عەرەبیی یەکگرتوو کۆبووەوە.

ئەمەش بزانە: کۆی گشتیی بەشداربووان دەگاتە نزیکەی شەش هەزار و 250 کەسایەتی، تەوەرە بنەڕەتییەکانی کارنامەی ئەمساڵی لووتکەی جیهانیی حکوومەتەکان پێکدێن لە: حکوومڕانیی جیهانی، خۆشگوزەرانیی کۆمەڵایەتی، گەشەپێدانی ئابووری و داهاتووی شارەکان. لە ماوەی سێ ڕۆژی لووتکەکەدا، زیاتر لە 450 دانیشتنی گفتوگۆ و 25 پانێل بەڕێوە دەچن.

باکگراوند: سەرۆکوەزیران، مەسرور بارزانی، لەسەر بانگهێشتی فەرميی شێخ محەمەد بن ڕاشد ئال مەکتووم، جێگری سەرۆک و سەرۆکوەزیرانی ئیمارات و حاکمی دوبەی، بەمەبەستی بەشداریکردن لە لووتکەی حکومەتەکانی جیهان 2026 بەشدارە، ئێوارەی ڕۆژی دووشەممە، 2-2-2026، گەیشتە دوبەی و لەلایەن عەبدوڵلا ئەلنعێمی، وەزیری دادی ئیمارات پێشوازی لێ کرا. سەرۆکوەزیران، لە لووتکەکەدا، زنجیرەیەک کۆبوونەوە و دیدار لەگەڵ بەرپرسانی باڵای ئیماراتی و سەرکردەکانی وڵاتانی بەشدار لە لووتکەکە ئەنجام دەدات، بۆ تاوتوێکردنی پتەوکردنی پەیوەندیی دوولایەنە و گفتوگۆکردن لەبارەی دوایین پێشهات و گۆڕانکارییەکانی عێراق و ناوچەکە.