کەسانی خاوەن پێداویستی تایبەت لە باجی هاوردەکردنی ئۆتۆمبێل دەبەخشرێن

ئاڤا نیوز

وتەبێژی وەزارەتی کاروباری کۆمەڵایەتی عێراق ڕایگەیاند، بەگوێرەی هەمواری یاسای مافی خاوەن پێداویستییە تایبەتییەکان، کەسانی خاوەن پێداویستی تایبەت لە باجی هاوردەکردنی ئۆتۆمبێل بەخشراون و بێبەرامبەریش بیمەی تەندروستییان بۆ دابینکراوە.

وێنە گەورەکە: حکومەتی عێراق سەرەڕای ئەوەی بە یاسا هەوڵی گەرەنتیکردنی هەندێک لە مافەکانی کەسانی خاوەن پێداویستی تایبەتی داوە، بەڵام تائێستا لە کەرتەکانی وەک نیشتەجێبوون، وەبەرهێنان و ڕێگەوبان و شەقامەکان ڕەچاوی شوێنی تایبەت بە کەسانی خاوەن پێداویستی تایبەت ناکرێت و لەم ڕوەوە ئەوان هەست بە نایەکسانی دەکەن.

لێدوانی تایبەت: حەسەن خەوام، وتەبێژی وەزارەتی کاروباری کۆمەڵایەتی عێراق بە ئاڤا میدیای ڕاگەیاند، بەگوێرەی هەمواری یاسای مافی خاوەن پێداویستییە تایبەتییەکان کە ئێستا بەرکارە، کەسی خاوەن پێداویستی تایبەت دەتوانێت ئۆتۆمبێل هاوردە بکات بەجۆرێک لەگەڵ ڕێژەی کەمئەندامییەکەی گونجاوبێت، لەو کاتەشدا ئۆتۆمبێلەکە لە باج دەبەخشرێت.

- ئەگەر کەسەکە توانای شۆفێریکردنی نەبێت دەتوانێت بەناوی کەسێکی دیکەوە هاوردەی بکات کە سەرپەرشتی دەکات، لەم حاڵەتەش ئۆتۆمبێلەکە لە باج دەبەخشرێت، بەڵام تا پێنج ساڵ ناکرێت بەناوی کەسێکی دیکەوە.

- تائێستا زیاتر لە 66 هەزار کەس لەو یاسایە سوودمەندبوون.

- هەر بەگوێرەی یاساکە نرخی گەشتی ئاسمانی بۆ خاوەن پێداویستی تایبەت، لە ساڵێکدا دووجار 50% داشکاندنی بۆ دەکرێت، لە خوێندنی باڵا و دامەزراندنیشدا بەڕێژە کورسییان بۆ دیاریکراوە.

- هەر بەگوێرەی یاساکە بیمەی تەندروستییان بێبەرامبەر بۆ دابینکراوە.