سوودانی: ڕۆڵی نێوەندگیریمان لەنێوان ئەمریکا و ئێران بینیوە

ئاڤا نیوز

سەرۆکوەزیرانی عێراق ڕایدەگەیێنێت، بەو پێیەی عێراق پەیوەندی باشی لەگەڵ ویلایەتە یەکگرتووەکانی ئەمریکا و کۆماری ئیسلامی ئێران هەیە، "ڕۆڵی نێوەندگیریمان لەنێوان هەردوو وڵات لە بەغدا بینیوە".

وێنە گەورەکە: ئەمریکا و ئێران هەوڵی لێکتێگەیشتن و نزیکبوونەوە لەیەکتری دەدەن بۆ ئەم مەبەستە چەندین جار بۆ پرسی ئەتۆمی ئێران بەنێوەندگیری عومان کۆبوونەتەوە.

لێدوانی ڕۆژنامەوانی: محەممەد شیاع سوودانی، سەرۆکوەزیرانی عێراق لە چاوپێکەوتنێکی تەلەفزیۆنیدا ڕایگەیاند: هەمیشە لەگەڵ ئاراستەی گفتوگۆ و گەڕانەوە بۆ دانوستان بووینە لەسەر دۆسیەی ناوەکی، هەر بەو ئاراستەیەش کارمان کردووە. تەنانەت ڕۆڵی نێوەندگیریشمان لەنێوان هەردوو وڵات لە بەغدا بینیوە.

لە هەمان کاتدا: سەرۆکوەزیرانی عێراق دەڵێت: دانیشتن و دەستپێشخەریی لەلایەن حکومەتەوە کراوە. ئێستا ئەم دانیشتنانە دەستیان پێکردووە و دەستپێکردنی ئەم گفتوگۆیانەش ڕاگەیێنراوە، بێگومان ئێمە پشتگیری و پاڵپشتی ئەو هەوڵانە دەکەین و هێشتا لە پەیوەندیداین لەگەڵ هەردوولا بۆ گەیشتن بە ڕێککەوتن، بە ئامانجی کەمکردنەوەی هەڵکشانەکان.

کاریگەریی و لێکەوتەکان: بەگوتەی سوودانی ئەگەر هەردوولا بگەنە ڕێککەوتن، ئەوا کۆتایی بەو هەڵکشانە دەهێنێت و بەشداری لە سەقامگیریی ناوچەکە دەکات، بە پێچەوانەوە ڕووبەڕووبوونەوە لە ناوچەکە دروست دەبێت و ناوچەکە ئازاری زۆری چەشتووە و هێشتا بە شێوەیەکی بەردەوام ئازار دەچێژێت و لە ئەنجامیشدا ناسەقامگیریییەکە بۆ هەموو وڵاتانی ناوچەکەیە.