د. لەتیف ڕەشید: یاسای نەوت و غاز کۆتایی بە کێشەکانی بەغدا و هەولێر دەهێنێت

ئاڤا نیوز

سەرۆککۆماری عێراق، زۆربەی کێشەکانی  نێوان حکومەتی فیدراڵی و هەرێمی کوردستان و پارێزگاکان بەنەبوونی یاسای نەوت و غاز دەبەستێتەوە و دەڵێت" پەسەندکردنی ئەو یاسایە کۆتایی بەهەموو کێشە و ناکۆکییەکان دەهێنێت". 
 
وێنە گەورەکە:  بەهۆی ناکۆکی نێوان لایەنە سیاسییەکانی عێراق ڕەشنووسی یاسای نەوت و غاز لەساڵی 2007 ـەوە لە پەرلەمان پەکیکەوتووە و لە هەر خولێکی پەرلەمانی بەپاساوێک گواستراوەتەوە بۆ خولی دواتر و چەند جارێکیش گەڕاوەتەوە ئەنجوومەنی وەزیران، یاساکە یەكێكە لەو یاسایانەی کە گرنگییەکی زۆری بۆ هەرێمی كوردستان هەیە.

 

لێدوانی فەرمی: د. لەتیف ڕەشید، سەرۆککۆماری عێراق لەچاوپێکەوتنێکی تەلەفزیۆنی ڕایگەیاند:  یاسای نەوت و غاز یەكێكە لەو یاسایانەی کە گرنگییەکی زۆری بۆ عێراق هەیە، دەرکردنی ئەو یاسایە کۆتایی بە زۆرێک لە کێشەکانی پەیوەست بە نەوت و کێشە داراییەکانی نێوان هەرێمی کوردستان و حکومەتی عێراق و پارێزگاکان دەهێنێت.

ئەمەش بزانە: سەرەڕای ڕێککەوتنی لایەنە سیاسییەکانی پێکهێنەری کابینەکەی محەممەد شیاع سوودانی، لەسەر گەڵاڵەکردن و دەرکردنی یاسای نەوت و غاز لە عێراق، بەڵام ئاسۆیەکی ڕوون لەبەردەم پەسەندکردنی ئەو یاسایە لەم خولەی ئێستای پەرلەمان نییە.