سوودانی: بەغدا هەمیشە وەکو سەرچاوەی هێز و پایەی بڕیاردانی عەرەبی دەمێنێتەوە

ئاڤا نیوز

دوای کۆتاییهاتنی کارەکانی لووتکەی عەرەبی، محەممەد شیاع سودانی، سەرۆكوەزیرانی عێراق دووپاتیكردەوە، بەغدا هەمیشە وەك گۆڕەپانی كردەوەی هاوبەشی عەرەبی و سەرچاوەی هێز و دەسەڵات و پایەی بڕیاردانی عەرەبی دەمێنێتەوە.

وێنە گەورەکە: ڕۆژی شەممە 17-05 2025، 34ـەمین لووتکەی عەرەبی بە بەشداریی سەرۆک و ڕابەرانی 22 وڵات لە بەغدا بەڕێوەچوو.

ڕاگەیێنراوی فەرمی: محەممەد شیاع سوودانی، سەرۆکوەزیرانی عێراق لە تۆڕی "ئێکس" ڕایەگەیاند:

٠ سوپاسی دڵسۆزانەتان دەكەم، بەناوی عێراق و حكومەت و گەلەوە، بۆ ئەو برا عەرەبانەی بەشدارییان لە لووتكەكانی بەغدا كردووە، لووتكەی عەرەبی و گەشەپێدان، هیوادارین دەرئەنجامەكانی هۆکاربن بۆ  گەیشتن بە خواستەكانی گەلانمان لە هەموو شوێنێكی جیهانی عەرەبیدا.

٠ بەغدا هەمیشە وەك گۆڕەپانێك بۆ كردەوەی هاوبەشی عەرەبی و سەرچاوەی هێز و دەسەڵات و پایەی بڕیاردانی عەرەبی دەمێنێتەوە.

٠ دڵ و دەستی عێراقییەكان هەمیشە كراوەن بەرامبەر بە هەموو هەنگاوێكی كاریگەر بۆ نەخشاندنی ئایندە و هەموو هەوڵێک بۆ پاڵپشتیکردن لە سەقامگیری و گەشەسەندن و سنووردارکردنی بڵاوبوونەوەی ململانێكان و هیوای گەلەكەمان بەدی بهێنێت.

ئەوەی پێویستە بیزانیت: دوای کۆتاییهاتنی کارەکانی لووتکەی عەرەبی لە بەغدا، ڕاگەیێنراوی کۆتایی لووتکەکە بڵاوکرایەوە و تێیدا جەختکراوەتەوە کە کۆبوونەوەی لووتکە بە ئامانجی یەکخستنی هەوڵەکانە بۆ بەدیهێنانی بەرژەوەندییەکانی گەلانی ناوچەکە.