لە دەربەندیخان 62 ماسی ڕاوکراو دەستی بەسەردا گیرا

ئاڤا نیوز

 

بەڕێوەبەرایەتیی پۆلیسی دارستان و ژینگەی پارێزگای سلێمانی دەستبەسەرداگرتنی 62 ماسی ڕاوکراوی لە بەنداوی دێوانە لە دەربەندیخان ڕاگەیاند.

 

بۆچی گرنگە: ئەم وەرزە، وەرزی گەرادانانی ماسییە، بۆیە ساڵانە، بۆ ماوەی سێ مانگ بە مەبەستی بووژانەوە و پاراستنی سامانی ماسی، ڕاوی ماسی لە دەریاچە و ئاوەکانی کوردستاندا قەدەغە دەکرێت؛ بڕیاری قەدەغەکردنەکەش لە 10ـی 3ـی 2025 تاوەکو 20ـی 6ـ 2025 لە تەواوی ناوچەکانی هەرێمی کوردستان جێبەجێ دەکرێت.

 

بڵاوکراوەی فەرمی: بەڕێوەبەرایەتیی پۆلیسی دارستان و ژینگەی پارێزگای سلێمانی ڕایگەیاند: بە مەبەستی ڕێگریکردن لە دیاردەی ڕاوکردنی ماسی، تیمێکی بەشی پۆلیسی دارستان و ژینگەی دەربەندیخان لە دەرچوونێکی مەیدانی بۆ ناو بەنداوی دێوانە، توانیان شەش تۆڕی ماسی هەڵبگرنەوە، کە لەلایەن سەرپێچیکارانەوە دانرابوو، دەست بەسەر 62 ماسی قەبارە جیاوازی ڕاوکراودا گیراوە.

 

زانیاریی زیاتر: پەڕاوی لێکۆڵینەوە بۆ وەرگرتنی ڕێکاری یاسایی لەلایەن دادوەری لێکۆڵینەوەوە کراوەتەوە.

 

ئەوەی پێویستە بیزانیت: ئەگەر ئاژەڵ یان باڵندە و ماسی کە ڕاوکرابوون بە کەڵکی خواردن بێن، ئەوا دەکرێن بە دۆسیە و دەبرێنە پێشی دادوەر، دواجار دادوەر بڕیاریان لەسەر دەدات، لە ڕێی لیژنەیەکەوە دەسەلمێنرێت کە گۆشتەکەیان بە کەڵکی خواردن دێت، بۆیە هەر لەلایەن لیژنەکەوە دەخرێنە مەزادەوە و گۆشتەکە لەو سنوورەی ڕاوکراوە دەفرۆشرێت و پارەکەی بۆ حکومەت دەگەڕێنرێتەوە.