وەزارەتی کشتوکاڵ: ئەمساڵ کەمتر لە یەک ملیۆن تۆن گەنم بەرهەم دێت

ئاڤا نیوز

 

بەهۆی وشکەساڵی و کەمی بارانبارینەوە، ڕێژەی  بەرهەمهێنانی گەنم لە پارێزگاکانی هەرێمی کوردستان بەراورد بە ساڵی ڕابردوو دادەبەزێت و بەشێکی زۆری جووتیاران گەنمەکانیان دروێنە ناکەن، وەزارەتی کشتوکاڵ پلانی قەرەبوو کردنەوەی جووتیارانی هەیە.

 

وێنە گەورەکە: کەمی دابارینی ئەمساڵ کاریگەریی نەرێنی خستووەتە سەر بەرهەمی ئەمساڵی دانەوێڵەی جووتیارانی هەرێمی کوردستان و عێراق، بەشێکی زۆری زەوییە دێمەکان گەنمەکانیان درووێنە ناکرێت و بەرهەمەکەی لەناوچووە، بەهۆی ئەمەشەوە لە ماوەی داهاتوودا ڕێژەیەکی کەمی گەنم بەرهەم دێت.

 

لێدوانی فەرمی: هیوا عەلی، گوتەبێژی وەزارەتی کشتوکاڵ و سەرچاوەکانی ئاو بە ئاڤای گوت، "گۆڕانکاری کەش و هەوا کاریگەری نەرێنی لەسەر ئاسایشی خۆراک هەیە، شاری هەولێر زۆرترین زیانی بەرکەوتووە و پێشبینی دەکەین ئەمساڵ کەمتر لە یەک ملیۆن تۆن گەنم بەرهەم بێت."

 

ئەمەش بزانە: ئەمساڵ بەگوێرەی پلانی وەزارەتی بازرگانی عێراق 400 هەزار تۆن گەنم لە جووتیارانی هەرێمی کوردستان وەردەگرێت، بەڵام کار لەسەر ئەوە دەکرێت ئەو بڕیارە نوێیەی سەبارەت بە وەرگرتنی گەنمی چوارچێوەی کشتوکاڵی و دەرەوەی پلانی کشتوکاڵی، جووتیارانی هەرێمی کوردستانیش بگرێتەوە.