دوای 36 ساڵ عێراق پشکنین بۆ کاریگەریی چەکی کیمیایی لە هەڵەبجە دەکات

ئاڤا نیوز

 

36 ساڵ دوای کیمیابارانی هەڵەبجە لەلایەن ڕژێمی بەعسی لەناوچوو، شاندێکی وەزارەتی عێراق دەستی بە پشکنین بۆ مانەوە یان کاریگەریی چەکی کۆمەڵکوژی کیمیایی دەکەن.

 

وێنە گەورەکە: شاندێکی وەزارەتی ژینگەی عێراق، پشکنینی تیشکدەرەکانیان بۆ ئاو، هەوا و خاکی ماڵێک کرد، بۆ ئەوەی دەرەنجامەکەی ببەنەوە لای وەزیری ژینگەی عێراق، لەو پشکنینانە ھیچ ئاماژەیەک بۆ ژەھراویبوونی خاک و ئاو و هەوای ھەڵەبجە دەرنەکەوتووە.

 

لێدوانی فەرمی: "دوای ڕووخانی ڕژێمی بەعسی عێراق، دەبووایە ئەو پشکنینانە بکرێن، ئێستاش پێویستە بە کۆمەڵێک پرۆژەی گەورەی خزمەتگوزارییەوە عێراق قەرەبووی هەڵەبجە بکەنەوە، نەوەک بیانوو بە پڕۆژەیاسای بە پارێزگاکردنی هەڵەبجە بگیرێت."
شوان محەممەد، ئەندامێکی لیژنەی شەھیدان و قوربانییان و زیندانییانی سیاسیی ئەنجوومەنی نوێنەرانی عێراق وای بە ئاڤا نیوز گوت.

 

زانیاریی زیاتر: شوان محەممەد جەختی کردووەتەوە کە دەبێت حکومەتی عێراق هاوشێوەی ئاوارەکانی شەڕی کەنداو مامەڵە لەگەڵ زیانلێکەوتووانی هەڵەبجە بکات.