نەتەوە یەکگرتووەکان زیاتر لە ملیارێک دۆلار دەداتە عێراق و هەرێمی کوردستان

ئاڤا نیوز

سندوقی کەشوهەوای سەوزی نەتەوە یەکگرتووەکان بڕیاریدا بەمەبەستی هاوکاری عێراق لە گۆڕانکارییەکانی کەشوهەوا، بەبڕی  1.3 ملیار دۆلار هاوکاری عێراق و هەرێمی کوردستان بکات.

ئەوەی پێویستە بیزانیت: سندوقی کەشوهەوای سەوز یارمەتی پێشکەشی ئەو وڵاتانە دەکات کە گۆڕانی کەشوهەوا بە توندی کاریگەریی لەسەر ژیانی خەڵک دروستکردووە، ئەوەش بەو ئامانجەیە کە بتوانن لەگەڵ گۆڕانکارییەکانی کەشوهەوادا خۆیان بگونجێنن و گۆڕانکارییەکان کەمتر کاریگەری لەسەر ژیانیان دروستبکات.

لێدوانی فەرمی: هەڵۆ عەسکەری، وەزیری ژینگەی عێراق ڕایگەیاند، سندوقی کەشوهەوای سەوز (GCF)ی نەتەوە یەکگرتووەکان ڕەزامەندی داوە بەبەهای 1.3 ملیار دۆلار پشتیوانی بەرنامەی عێراق بۆ پشتیوانی کەشوهەوا بکات، ئەو پارەیەش بۆ ئەو پڕۆژانە لە پارێزگاکانی عێراق و هەرێمی کوردستان تەرخان دەکرێن کە ڕۆڵیان لە کەمکردنەوەی گۆڕانی کەشوهەوادا دەبێت.

- بە وتەی وەزیری ژینگە ئەو پارەیە لە پڕۆژەی جیاوازی وەزارەتەکان، کەرتی کشتووکاڵ، شارەوانی و سەرچاوەکانی ئاودا خەرج دەکرێت، ئەوەش دەستکەوتێکی حکومەتی عێراقە بۆ بەدیهێنانی ئامانجەکانی کەشوهەوا و ڕووبەڕووبوونەوەی گۆڕانی کەشوهەوا.