فایلی خەڵک؛ کەسێکی خاوەن پێداویستی تایبەت: تەنیا ڤیزایەکی ئەڵمانیام پێویستە؛ پێمی نادەن

ئاڤا نیوز

کەسێكی خاوەن پێداویستیی تایبەت کە چاوەکانی بە ئاستی نیو مەتر زیاتر نابینێت و چارەسەرەکەشی تەنیا لە ئەڵمانیایە، گەنجەکە هەموو ڕێککارەکانی وەرگرتنی ڤیزای تێپەڕاندووە، بەڵام  پێی نادەن.

چیرۆکی سەرەکی: میران ڕەحمان کە دانیشتووی چەمچەماڵە، وەک خۆی ئاماژەی پێ دەکات کە چاوەکانی تەنیا هەتا نیو مەتر دەبینێت، چارەسەرەکەشی لە ئەڵمانیایە، بەڵام ڤیزەی پێ نادەن.

لێدوانی فەرمی: میران ڕەحمان بە ئاڤای ڕاگەیاند، "من پێویستیم بە هاوکاری دارایی نیە و لەسەر ئەرکی خۆم دەچم بۆ ئەڵمانیا، تەنیا پێویستم بە ڤیزایەکی ئەڵمانیایە، بۆئەوەی بچم بۆ ئەڵمانیا و چارەسەری نەخۆشییەکەم بکەم".

- "نەخۆشخانەیەکی ئەڵمانی سێ جار داوەتنامەی بۆ ناردووم بۆ چارەسەر، پارەشمان وەکو بارمتە داناوە، هەموو ڕێکارێکمان کردووەم بەڵام سوودی نییە".

 لەلایەکی دیکەوە: دکتۆر ئارام، پسپۆری نەخۆشییەکانی چاو لە سلێمانی، دەڵێت: میران دەماری چاوی لاوازە تەنیا نیومەتر دەبینێت، نەخۆشخانەی فیدۆرۆڤ لە بەرلین، جۆرە ئامێرێکی هەیە بۆ چارەسەرکردنی نەخۆشی چاو، پەیوەندیم بە نەخۆشخانەکە کردووە و پێشتریش باوکم چارەسەری لەو نەخۆشخانەیە وەگرتووە، پێیان گوتم چارەسەری ئەم نەخۆشە لەلای ئێمە هەیە، بەڵام دەبێت نەخۆشەکە بێت و پشکنینی بۆ بکەین.

بە تەنیشت ئەم بابەتەوە: فەرمانگەی پەیوەندییەکانی دەرەوەی حکومەتی هەرێمی کوردستان، نووسراوی پشتگیرییان بۆ کردووە، بەڵام ڤیزایان هەر پێنەداوە.