لە بارزان پرۆژەیەكی گەورەی بەخێوكردنی مانگای شیردەر دادەمەزرێت

ئاڤا نیوز

لە دەڤەری بارزان، بەردی بناغەی پرۆژەی كێڵگەی زۆم بۆ بەخێوكردنی مانگای شیردەر دانرا كە دەیان هەلی كار بۆ هاووڵاتیان دەڕەخسێنێت.

چیرۆكی سەرەكی: ئەمڕۆ 18ـی ئایاری 2025، بە سەرپەرشتی مەلا مستەفا بارزانی، لە ڕێوڕەسمێكدا؛ بەردی بناغەی پرۆژەی كێڵگەی زۆم بۆ بەخێوكردنی مانگای شیردەر لەلایەن کۆمپانیای (GEG construction) لە دەڤەری بارزان دانرا.

ڕاگەیێنراوی فەرمی: نووسینگەی مەلا مستەفا بارزانی لە ڕاگەیێنراوێكدا ئاماژەی بەوە كردووە، دامەزراندنی پرۆژەكە، لەپێناو خزمەت گەیاندنە بە خەڵک و ڕەخساندنی هەلی کارە بۆ هاووڵاتیان، لەپاڵ برەودان بە كەرتی كشتوكاڵی و ئاژەڵداری لە هەرێمی كوردستان.

لێدوانی فەرمی: مەلا مستەفا بارزانی لە ڕێوڕەسمی دانانی بەردی بناغەی پرۆژەی كێڵگەی زۆم وتارێكی پێشكەشكرد و ڕایگەیاند، هەنگاوەكانی پرۆژەی زۆم بەگشتی و كێڵگەی بەخێوكردنی مانگای شیردەر، مەبەست لێی ڕەخساندنی هەلی کاری زیاترە بۆ گوندنشین و جووتیار و هاووڵاتیان و بەرهەمهێنانی بەرهەمی خۆماڵی و پشت بەستن بە داهاتی ناوخۆیی.

ئەوەی پێویستە بیزانیت: كێڵگەی زۆم بۆ بەخێوكردنی مانگای شیردەر، چوار بەشی سەرەکی لە خۆدەگرێت کە بریتین لە: کێلگەی زۆم بۆ بەخێوکردنی مانگای شیردەر، پڕۆژەی زۆم بۆ کشتوکاڵ، سەنتەری ڤێتەرنەری زۆم، زۆم مارکێت.