وەزیری ئەوقاف: هەموو ئامادەكارییەك بەباشترین شێوە بۆ حاجیانی كوردستان كراوە

ئاڤا نیوز

بەرەبەیانی ئەمڕۆ، یەكەم كاروانی حەجخوازانی كوردستان لەڕێگەی فڕۆکەخانەی  نێودەوڵەتیی هەولێرەوە بەرەو سعوودیە بەڕێكەوت، وەزیری ئەوقاف و كاروباری ئایینیش ڕایگەیاند، هەموو ئامادەكارییەك بەباشترین شێوە بۆ حاجییانی كوردستان كراوە.

وێنە گەورەكە: لە كۆی پێنج هەزار و 136 حەجخواز كە ناویان بۆ بەجێگەیاندنی فەریزەی حەج گەڕاوەتەوە، سێ هەزار و 491 حەجخواز لەڕێگەی هەردوو فڕۆكەخانەی نێودەوڵەتیی هەولێر و سلێمانییەوە بەرەو سعوودیە بەڕێدەكەون، گەشتەكانیش لە 19ـی ئایار تاوەکو 28ـی هەمان مانگ بەردەوام دەبێت.

لێدوانی فەرمی: بەر لە بەڕێككەوتنی حەجخوازان، د. پشتیوان سادق، وەزیری ئەوقاف و کاروباری ئایینی حکوومەتی هەرێمی کوردستان، لە كۆنفڕانسێكی ڕۆژنامەوانیدا ڕایگەیاند: لەڕێگەی بەڕێوەبەرایەتیی گشتیی حەج و عومرەوە، سەرجەم ئامادەکارییەکان كراون و بە باشترین شێوە هاووڵاتیان بۆ بەجێگەیاندنی فەریزەی حەج بەڕێ دەکەین.

لەلایەكی دیكەوە: نیاز نەقشبەندی، بەڕێوەبەری گشتیی حەج و عومرەی هەرێمی کوردستان ڕایگەیاند: لە ڕۆژانی ڕابردوودا، هەزار و 646 حەجخواز بەڕێگەی وشکانی بەرەو سعوودیە بەڕێ کەوتوون، ئەمساڵ شوێنێکی نزیک لە حەرەمی مەککە بۆ حاجییانی هەرێمی کوردستان دابین کراوە، لەگەڵ ئامادەکردنی سێ ژەمی خواردن و چەندین تیمی پزیشکی و مورشیدی ئایینی، هاوكات ژمارەیەك فەرمانبەری وەزارەتی ئەوقاف، هاوەڵی حاجییانی كوردستان دەبن.