ئاڤا بەدواداچوون بۆ لێبوردنی تایبەت بۆ بەندکراوانی چاکسازییەکانی کوردستان دەکات

ئاڤا نیوز

ساڵی ڕابردوودا سەرۆکی هەرێمی کوردستان لێبوردنی تایبەتی بۆ ئەو زیندانیانە دەركرد كە نەخۆشیی درێژخایەنیان هەیە، دوای پشکنین ژمارەیەک بەندکراو ئازادکران و ئاڤا بەدواداچوون بۆ دوایین هەوڵی چاکسازییەکان لەوبارەیەوە دەکات.

وێنە گەورەکە: بەڕێوەبەرایەتیی گشتیی چاکسازییەکانی هەرێمی کوردستان لەڕێگەی وەزارەتی تەندروستییەوە پشکنین بۆ ئەو بەندکراوانە دەکات کە سزای لە سێدارەدانیان هەیە و نەخۆشیی درێژخایەنیان هەیە، بەگوێرەی ئەنجامی پشکنینەکان و خراپی دۆخی تەندروستییان بە بڕیارێکی تایبەت ئازاد دەکرێن، لە ساڵی ڕابردووشدا چەند کەسێک بەمشێوەیە ئازاد کران.

چیرۆکی سەرەکی: هاونیشتمانیانی دهۆک و کەسوکاری زیندانیان پێیان وایە لە دهۆک یەک گرووپی لەم شێوەیەی بەندکراوەکان ئازاد کراون، بەڵام لە هەولێر و سلێمانی خەڵکی دیکە ئازادکراون و دهۆک پشتگوێ خراوە، ئاڤا ڕاستی بابەتەکە ئاشکرا دەکات.

لێدوانی فەرمی: ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان بە ئاڤای ڕاگەیاند: جگە لەو ژمارەیەی لە چەند مانگی ڕابردوو لە تەواوی هەرێمی کوردستان ئازاد کراون، هیچ بڕیارێکی دیکەی تایبەت لەو بارەیەوە دەرنەچووە، هەروەها پرۆسەکە لە سەرانسەری کوردستان بە یەکسانی جێبەجی دەکرێت، واتە بە یەکجار لە هەولێر و سلێمانی و دهۆک بەندکراوەکان ئازاد دەکرێن.

ئەوەی پێویستە بیزانیت: ئەو بەندکراوانەی ئازاد دەکرێن، نەخۆشیی درێژخایەن، شێرپەنجە و شەلەل دەماغ و ڤایرۆسی جگەریان هەیە، یان جەڵتە لێی داون و لە بارودۆخێکی خراپدان.