پڕۆسەی وردبینی لە فۆڕمی دابەشکردنی زەوی کۆتایی دێت

ئاڤا نیوز

کۆتایی ئەم مانگە پڕۆسەی وردبینی لە فۆڕمی دابەشکردنی زەوی کۆتایی دێت و زیاتر لە 450 هەزار فەرمانبەر، پێشمەرگە و خانەنشین لە وەرگرتنی زەوی سوودمەند دەبن.

وێنە گەورەکە: نزیکەی ساڵێکە هەنگاوەکانی پڕۆسەی دابەشکردنی زەوی لە هەرێمی کوردستان دەستیپێکردووە، تاوەکو ئێستا وردبینی و پێداچوونەوە بە فۆڕمی زیاتر لە 400 هەزار فەرمانبەر و پێشمەرگە و خانەنشین کراوە بۆ سوودمەندبوون لە پڕۆسەکە و ڕەزامەندیشیان لە ئەنجوومەنی وەزیران گەڕاوەتەوە.

لێدوانی فەرمی: سەربەست مەولوود، سەرپەرشتیاری تیمی وردبینیی پرۆسەی دابەشکردنی زەوی له‌ وه‌زاره‌تی شاره‌وانی لە گەشتی هەواڵەکانی کاتژمێر 9ـی ئاڤا گوتی، "زیاتر لە 50 هەزار فۆڕم ماون بۆ ئەوەی وردبینییان تەواو بێت و ڕەوانەی ئەنجوومەنی وەزیران بکرێن، ئەو فۆڕمانە هی وەزارەتەکانی پێشمەرگە و بەڕێوەبەرایەتییەکانی خانەنشینین، تا کۆتایی ئەم مانگە سەرجەمیان تەواو دەبێت."

ژمارەکان وادەڵێن: لە پڕۆسەی وەرگرتنی زەوی، زۆرترین فۆڕمی وەزارەتی ناوخۆ پەسەندکراون، بەراورد بە وەزارەتەکانی دیکە یەک لەسەر سێی ڕێژەکە پێکدەهێنن:

٠ وەزارەتی ناوخۆ: 100 هەزار فۆڕم

٠ وەزارەتی پێشمەرگە: 88 هەزار فۆڕم

٠ وەزارەتی پەروەردە: 80 هەزار فۆڕم